काठमाडौं- चालु आर्थिक वर्षको १० महिनामा गत वर्षको तुलनामा २ खर्ब न्यून व्यापार घाटा कायम भएको छ। 

भन्सार विभागका अनुसार आयात र निर्यात दुवै घट्दा साउनदेखि बैशाखसम्मको अधविमा यो वर्ष १२ खर्ब ४ अर्ब व्यापार घाटा भएको छ। यो गत वर्षको तुलनामा १५ प्रतिशत अर्थात् गत वर्षको तुलनामा २ खर्ब २६ अर्ब रुपैयाँले न्यून हो। 

चालु वर्षको छ महिनासम्म उच्च मूल्यका वस्तुको आयातमा सीमित प्रतिबन्ध लगाइएको, बजारमा भएको तरलता अभावका कारणले माग खुम्चिँदा पनि आयात घटेको छ। आयात घट्दा व्यापार घाटा पनि न्यून भएको छ। 

गत वर्षको यही अवधिमा १४ खर्ब ३१ अर्ब व्यापार घाटा थियो।

यो अवधिमा  १३ खर्ब ३५ अर्ब ३२ करोड रुपैयाँको आयात भएको छ। भन्सार विभागका अनुसार यो वर्षको १० महिनामा गत वर्षको तुलनामा १६.७८ प्रतिशतले आयात घटेको छ। 

विभागका अनुसार आयातसँगै निर्यात पनि घटेको छ। चालु वर्षको १० महिनामा २४ प्रतिशतले निर्यात घटेको छ। 

साउनदेखि बैशाखसम्मको अवधिमा १ खर्ब ३० अर्ब रुपैयाँको निर्यात भएको छ। गत वर्षको यही अवधिमा १ खर्ब ७३ अर्ब रुपैयाँको निर्यात भएको थियो। 

आयात र निर्यात घटेसँगै कुल अन्तर्राष्ट्रिय व्यापार १० महिनामा गत वर्षको यही अवधिको तुलनामा १७ प्रतिशतले घटेको छ।