काठमाडौं- नेपाल उद्योग वाणिज्य महासंघका अध्यक्ष शेखर गोल्छाले नेपाली अर्थतन्त्र सुविधाजनक अवस्थामा नरहेको बताएका छन्।
नेपाल आर्थिक पत्रकार समाज (सेजन) ले आयोजना गरेको अन्तर्क्रिया कार्यक्रममा बोल्दै गोल्छाले आयात बढ्दै गएको, देशभित्र पैसाको अभाव देखिएकाले आर्थिक विस्तार हुनै नसक्ने अवस्थामा पुगेको बताए।
'बैंकसँग ऋण दिने पैसा छैन, जति छ त्यो ऋण महँगो भएको छ, महँगो ऋणले आर्थिक सामाजिक क्षेत्रमा चक्रीय असर पार्छ' उनले भने।
कोरोनाबाट उठ्दै गरेको अर्थतन्त्रले ठूलो स्रोत खोजे पनि रेमिट्यान्स घटेको, सरकारले पुँजीगत खर्च गर्न नसकेकाले समस्या अझ बिकराल हुँदै गएको उनले बताए।
'तीन महिनासम्म एउटा पनि अनुदान आएको छैन। सरकारी स्रोत पनि राम्रो छैन। यो अझै खराब हुने लक्षण छ। तर हामी एमसीसीजस्ता अनुदानमा राष्ट्रवाद खोजिरहेका छौँ' उनले भने।
