काठमाडौं- बारबर्दिया र गुलरिया जोड्ने जब्दीघाटको भत्किएको पुलको संरचना हटाएर तत्काल नयाँ पुल बनाउनुपर्ने लगायत १५ बुँदे माग राखेर अनशन बसेका सांसद सञ्जय गौतमले अनशन तोडेका छन्।

भौतिक पूर्वाधार तथा यातायातमन्त्री प्रकाश ज्वालासँग ११ बुँदे सहमतिपछि जब्दीघाट पुलमुनि अनशन बसेका बर्दियाका-१ बाट निर्वाचित सांसद गौतमले शनिबार ८औँ दिनमा अनशन तोडेका हुन्। अहिले उनलाई अस्पताल भर्ना गरिएको छ।

बर्दिया सदरमुकाम जोखिममा रहेकोले तत्काल तटबन्धनको बाँकी काम पूरा गर्नुपर्ने, बबई सिँचाइ आयोजना ३ वर्षभित्र पूरा गर्न बजेट सुनिश्चित गर्नुपर्ने, भुरीगाउँ-तेलपानी-सुर्खेत सडकखण्ड निर्माण कार्य यसै आर्थिक वर्षदेखि सुरू गर्न उनले सरकारसँग माग राखेका थिए।

साथै गुलरिया मूर्तिया नाका तुरून्त सुचारू गर्नुपर्ने, मध्यवर्ती क्षेत्रका बासिन्दालाई निःशुल्क बीमा व्यवस्था गरिनुपर्ने, बाढीपीडितलाई भूकम्पपीडित सरह राहत दिने व्यवस्था लागु गरिनुपर्ने, कपास विकास समिति विघटन गरी किसानहरूलाई मोही सरह हैसियत दिनुपर्ने, सत्तिघाट पुलमा आवश्यकताअनुसार स्पान थप गर्नुपर्ने माग पनि उनको थियो।

गत वर्ष बेमौसमी बर्सातका कारण बालीनालीमा क्षति पुगेकोले त्यसबेला घोषणा गरेअनुसार राहत दिनुपर्ने, राजापुर सिँचाइ आयोजनाको दोस्रो चरणको कामका लागि बजेट विनियोजन गरिनुपर्ने माग पनि उनले राखेका थिए।