काठमाडौं- नक्कली शरणार्थी प्रकरणमा मुछिएका भुटानी शरणार्थी नेता टेकनाथ रिजाल पक्राउ परेका छन्।
रिजाललाई जिल्ला प्रहरी परिसर काठमाडौंको टोलीले बिहीबार पक्राउ गरेको हो।
भुटानी शरणार्थीको पक्षमा वकालत गर्दै आएका नेता रिजालको पनि नक्कली शरणार्थी प्रकरणमा संलग्नता रहेको देखिएको भन्दै प्रहरीले पक्राउ गरेको हो। उनी पक्राउ परेसँगै यस प्रकरणमा पक्राउ पर्नेको संख्या १६ पुगेको छ।
आज नै प्रहरीले गृह मन्त्रालय अन्तर्गतको केन्द्रीय हज समितिका अध्यक्ष शमशेर मियाँलाई पक्राउ गरेको थियो। हज समितिको गाडी नक्कली शरणार्थी बनाउने क्रममा प्रयोग भएको पाइएपछि उनी पनि अनुसन्धानमा तानिएका हुन्।
यस प्रकरणमा पक्राउ परेका नेपाली कांग्रेसका नेता बालकृष्ण खाण, नेकपा एमालेका नेता टोपबहादुर रायमाझी, उनका छोरा सन्दीप, केशव दुलाल, सानु भण्डारी, टंककुमार गुरूङ, सन्देश शर्मा, सागर राई, इन्द्रजित राई, टेकनारायण पाण्डे, नरेन्द्र केसी, आङटावा शेर्पा, रामशरण केसी र गोविन्द चौधरी लगायत प्रहरी हिरासतमा छन्।