काठमाडौं- नक्कली भुटानी शरणार्थी प्रकरणमा पक्राउ परेका नेपाली कांग्रेसका नेता बालकृष्ण खाण र नेकपा एमालेका नेता टोपबहादुर रायमाझीसहित १४ जनालाई थप तीन दिन हिरासतमा राख्न अनुमति दिइएको छ।

काठमाडौं जिल्ला अदालतले बुधबार यस प्रकरणमा हालसम्म पक्राउ परेका सबैलाई थप तीन दिन हिरासतमा राखेर अनुसन्धान गर्न अनुमति दिएको हो। 

नेपाली नागरिकलाई भुटानी शरणार्थी बनाएर अमेरिका पठाउने प्रक्रणमा मुछिएपछि खाणलाई प्रहरीले गत बुधबार पक्राउ गरेको थियो। यसअघि पक्राउ परेका तत्काली गृहसचिव टेकनारायण पाण्डेले खाणकै सल्लाह तथा सहयोगमा आफूले काम गरेको उल्लेख गरेपछि खाणलाई प्रहरीले पक्राउ गरेको हो।

पक्राउ पुर्जी जारी भएदेखि फरार रहेका नेता रायमाझीलाई प्रहरीले आइतबार राति पक्राउ गरेको थियो। नेता रायमाझीविरुद्ध २० बैशाखमा पक्राउ पुर्जी जारी भएको थियो। उनका छोरा सन्दीप भने पक्राउ पुर्जी जारी भएलगत्तै पक्राउ परेका थिए।

हालसम्म प्रहरीले यस प्रकरणमा १४ जनालाई पक्राउ गरेको छ। नेता खाण र रायमाझीसहित उनका छोरा सन्दीप, केशव दुलाल, सानु भण्डारी, टंककुमार गुरूङ, सन्देश शर्मा, सागर राई, इन्द्रजित राई, टेकनारायण पाण्डे, नरेन्द्र केसी, आङटावा शेर्पा, रामशरण केसी र गोविन्द चौधरी प्रहरी हिरासतमा छन्।

उक्त घटनामा हालसम्म एक सय छ जनाले २० वटा जाहेरी दिइसकेको बताइएको छ। उक्त घटनाका पीडितहरुले कुल २३ करोड २५ लाख रूपैयाँ ठगी भएको जाहेरीमा उल्लेख गरेका छन्।