काठमाडौं- नेपाल राष्ट्र बैंकका डेपुटी गभर्नर बमबहादुर मिश्रले बजेट अनुसारकै मौद्रिक नीति तय हुने बताएका छन्।
नेपाल उद्योग परिसंघले आयोजना गरेको मेकइन नेपाल स्वदेशी समिटमा बोल्दै मिश्रले राष्ट्र बैंक र अर्थ मन्त्रालबीचमा निकट सहकार्य भइरहेको बताए। अहिलेदेखि नै नीतिगत कुरामा सरकार र बैंकबीच छलफल भइरहेको उनको भनाइ छ।
जुन मार्गमा बजेट आउँछ सोही अनुसार मौद्रिक नीतिको व्यवस्था तय हुनेमा आशंका नगर्न उनले आग्रह गरे।
पछिल्लो समय व्यवसायीहरूले बजारलाई सहजीकरण गर्नका लागि सरकार उदार भए पनि राष्ट्र बैंक अनुदार भएको गुनासो गर्दै आएका छन्। आगामी मौद्रिक नीतिलाई लचिलो बनाउनका लागि व्यवसायीहरूले अहिलेदेखि नै राष्ट्र बैंकमाथि दबाब बढाउँदै आएका छन्।
राजनीतिक नेतृत्वबाट दबाब बढाइरहेको निजी क्षेत्रलाई जवाफ दिँदै मिश्रले बजेटको लिकभन्दा बाहिर गएर कुनै पनि मौद्रिक व्यवस्था नहुने स्पष्ट पारेका हुन्।