काठमाडौं-  सांसद तथा अर्थशास्त्री डा. स्वर्णिम वाग्लेले दिगो आर्थिक विकासका लागि नीतिगत तथा संरचनागत रुपान्तरण हुनुपर्ने बताएका छन्। 

नेपाल उद्योग परिसंघले आयोजना गरेको 'मेकइन नेपाल स्वदेशी समिट २०२३' को उद्घाटन सत्रमा बोल्दै वाग्लेले अहिलेसम्म नेपालमा नीतिगत तथा अन्य सहुलियतका लागि उद्योगी व्यवसायीहरूले प्रशासनिक तथा राजनीतिक नेतृत्वको दैलो चहार्ने अवस्था रहेको तर यो अन्त्य हुनुपर्ने उनको भनाइ छ। 

‘गुणस्तरीय तथा नवीन उत्पादनका लागि लगाउनुपर्ने ऊर्जा नेता तथा कर्मचारीको अफिस र नेक्सस चहार्ने औद्योगिक रेजिमको अन्त्य हुनुपर्छ। निजी क्षेत्रले पनि यस्तै कुराका लागि पैरवी गर्नुपर्छ’, उनले भने। 

उद्योगी व्यवसायीहरूले प्रतिस्पर्धात्मक वातावरणमा काम गर्ने वातावरण बनाउनुपर्ने र यसका लागि नीतिगत र संरचनागत सुधार हुनुपर्ने उनको भनाइ छ। परिसंघको अभियानले यस्तै कुरालाई अघि बढाउनेमा विश्वस्त रहेको उनले बताए।

कुन ऐनको कुन दफाले इमानदार भएर पनि काम गर्न दिएको छैन? यस्ता दफा खोजेर सुधारका लागि माग गर्न वाग्लेले परिसंघलाई सुझाव दिए। सबैलाई सहज हुने तथा प्रतिस्पर्धात्मक वातावरण निर्माण हुने नीतिगत व्यवस्था नभएसम्म अहिलेजस्तै नेता तथा प्रशासककै निगाहमा चल्दा अर्थपूर्ण आर्थिक विकास नहुने उनको भनाइ छ।