काठमाडौं- रोमानिया र कम्बोडिया पठाइदिन्छु भन्दै लाखौँ रकम ठगी गर्ने दुई जना पक्राउ परेका छन्।
रोमानियाका प्रतिष्ठित कम्पनीमा मासिक एक लाख तलबमा काम लगाइदिने प्रलोभनमा पारी पीडितहरुबाट पटकपटक गरी १८ लाख रूपैयाँ ठगी गरेको अभियोगमा काठमाडौं बस्ने बागलुङका ३४ वर्षीय विशाल विश्वकर्मा पक्राउ परेका हुन्।
आइतबार लाजिम्पाटबाट पक्राउ परेका उनलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर पठाइएको प्रहरीले जनाएको छ।
यस्तै कम्बोडियामा पठाएर त्यहाँका क्यासिनोमा मासिक एक लाख रूपैयाँभन्दा बढी तलबमा काम लगाइदिन्छु भन्दै पीडितहरुबाट पटकपटक गरी १६ लाख रूपैयाँ ठगी गर्ने २९ वर्षीय सिद्धार्थ तामाङलाई आइतबार प्रहरीले पक्राउ गरेको छ।
गोकर्णेश्वर नगरपालिका शिवचोकबाट काठमाडौंको माकलबारी बस्ने सिन्धुपाल्चोकका तामाङलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर काठमाडौं पठाइएको छ।