काठमाडौं- नक्कली भुटानी शरणार्थी प्रकरणमा पक्राउ परेका नेपाली कांग्रेस नेता एवं पूर्व गृहमन्त्री बालकृष्ण खाँणसहित १२ जनालाई थप चार दिन हिरासतमा राखेर अनुसन्धान गर्न अनुमति दिइएको छ।

काठमाडौं जिल्ला अदालतले पूर्वमन्त्री खाँणसहित पक्राउ परेका १२ जनालाई आइतबार थप चार दिन हिरासतमा राखेर अनुसन्धान गर्न अनुमति दिएको हो। 

नेपाली नागरिकलाई भुटानी शरणार्थी बनाएर अमेरिका पठाउने प्रक्रणमा मुछिएपछि खाँणलाई प्रहरीले गत बुधबार पक्राउ गरेको थियो। यसअघि पक्राउ परेका तत्काली गृहसचिव टेकनारायण पाण्डेले खाँणकै सल्लाह तथा सहयोगमा आफूले काम गरेको उल्लेख गरेपछि खाँणलाई प्रहरीले पक्राउ गरेको हो।

यस प्रकरणमा हालसम्म १२ जना पक्राउ परेका छन्। प्रकरणमा मुछिएका नेकपा एमालेका नेता तथा पूर्वमन्त्री टोपबहादुर रायमाझी भने फरार छन्। प्रहरीले उनलाई खोजिरहेको छ। उनका छोरा सन्दीप रायमाझी भने प्रहरी नियन्त्रणमा छन्। 

हालससम्म टेकनारायण पाण्डे, नेता रायमाझीका छोरा सन्दीप, गिरोहका नाइके केशव दुलाल, सानु भण्डारी, टंक गुरुङ, सागर थुलुङ राईलगायत पक्राउ परेका छन्।