काठमाडौं- सडकमा बनिरहेको रिटेनिङ वाल गुणस्तरहीन भएको भन्दै एक युवक बिजुलीको हाइटेन्सन पोलमा चढेका छन्।
मोरङको बूढीगंगा गाउँपालिका- ७, डंग्राहाका ४० वर्षीय दिनेशकुमार माझी शनिबार बिहान ६ बजेतिर १ लाख ३२ हजार भोल्ट विद्युत् प्रवाह भइरहेको प्रसारण लाइनको पोलको टुप्पोमा चढेका हुन्।
बूढीगंगा ७ नम्बर वडा कार्यालयदेखि दक्षिणतर्फ जाने सडकमा निर्माण भइरहेको रिटेनिङ वाल गुणस्तरहीन भएको भन्दै बिजुलीको हाइटेन्सन पोलमा चढेका उनलाई ओराल्ने प्रयास भइरहेको छ। तर उनी भने गाउँपालिकाका अध्यक्ष र उपाध्यक्षले आफ्नो माग सम्बोधन गर्ने प्रतिबद्धता नगरेसम्म माथि नै बसिरहने, नओर्लिने अडानमा छन्।
गुणस्तरहीन काम रोक्न उनले माग गरेका छन्। आफ्नो मागलाई बेवास्ता गरे आत्मदाह गर्ने उनको चेतावनी छ।