काठमाडौं- काठमाडौं महानगरपालिकाले आगामी आर्थिक वर्ष २०८०/८१ को नीति, बजेट तथा कार्यक्रमका लागि सुझाव मागेको छ। अनलाइनमार्फत बजेटबारे सुझाव पठाउन सकिने महानगरले जनाएको छ। जसका लागि महानगरले बुधबार सामाजिक सञ्जालमार्फत क्यूआर कोर्डसमेत सार्वजनिक गरेको छ ।
अनलाइन सुझाव संकलन पोर्टलमा महानगरको विकास, सुविधा वितरण, सेवा प्रवाह तथा समृद्धिका लागि कुन-कुन क्षेत्रमा कस्ता नीति बनाउनु पर्ला? कस्ता कार्यक्रम राख्नु पर्ला? बजेटको कस्तो व्यवस्था गर्नुपर्ला? लगायत सहरी विकास र व्यवस्थापनसम्बन्धी शीर्षक र उपशीर्षक राखिएको महानगरले जनाएको छ।
शीर्षकसँग सम्बन्धित या शीर्षकले समेट्न नसकेको भए त्यही क्षेत्रको अन्त्यमा राखिएको अन्यमा गएर आफ्ना सुझाव र सुझावसँग सम्बन्धित कागजात अपलोड गर्न सकिने व्यवस्था गरिएको महानगरले जनाएको छ।
महानगरका अनुसार नागरिकका परिकल्पना र समस्या समाधानका न्यूनतम उपाय र योजनाहरूको विवरण ९ जेठ भित्र पठाइसक्नु पर्ने छ।
२३ वटा शीर्षकमा सुझाव पठाउन सकिने छ। सुझाव दिने व्यक्तिले कति वटा सुझाव प्राप्त गरे भन्ने विवरण पनि हेर्न सकिने महानगरले जनाएको छ।