भद्रकालीमा भ्रष्टाचारविरूद्ध आवाज : जनता अब सहँदैनन् [फोटो फिचर]

ऋग्वेद शर्मा

बुधबार, वैशाख २७ २०८०

भद्रकालीमा भ्रष्टाचारविरूद्ध आवाज : जनता अब सहँदैनन् [फोटो फिचर]

काठमाडौं- भ्रष्टाचार ढाकछोपविरूद्ध खबरदारी गर्दै नागरिकहरूले भद्रकालीमा शान्तिपूर्ण विरोध प्रदर्शन गरेका छन्। वृहत् नागरिक आन्दोलनका अगुवासहित नागरिकहरूले अमेरिका लैजाने नाममा सयौँ नेपालीलाई भुटानी शरणार्थी बनाउने र मानव तस्करी गर्ने गिरोहमा रहेकालाई संरक्षण नगरी कारबाही हुनुपर्ने माग गरेका छन्।

नक्कली भुटानी शरणार्थी बनाएर अमेरिका पठाउने ठगी धन्दामा पूर्वमन्त्रीलगायत उच्च पदस्थको संलग्नता देखिएपछि कसैलाई पनि उन्मुक्ति दिन नपाइने र निष्पक्ष छानबिन गरी कारबाही हुनुपर्ने माग नागरिकहरूले राखेका छन्। आन्दोलनमा नागरिक अगुवा केदारभक्त माथेमा, गोविन्द केसी, सञ्जीव उप्रेतीलगायतले नागरिकहरूले अब सहेर नबस्ने र निरन्तर खबरदारी गरिरहने बताए।

देशको अर्थतन्त्रलाई धराशायी बनाउने र अन्तर्राष्ट्रिय स्तरमै नेपालको छवि धुमिल बनाउने जघन्य अपराधमा संलग्न रहेकामाथि कानूनी कारबाही अगाडि बढाउन वृहत् नागरिक आन्दोलनमार्फत माग गरिएको छ।