काठमाडौं- नक्कली भुटानी शरणार्थी प्रकरणमा मुछिएका नेकपा एमालेका सचिव टाेपबहादुर रायमाझीलाई पार्टीले निलम्बन गरेको छ।

अनुसन्धानलाई सघाउन र कानूनी कारबाही प्रक्रिया अन्तिम टुंगो नलागेसम्म उनलाई निलम्बन गरिएको एमालेले जनाएको छ।

पक्राउ पुर्जी जारी भएपछि रायमाझी अहिले फरार छन्। उनका छोरा सन्दीपलाई भने पक्राउ परिसकेका छन्। 

यस प्रकरणमा आज मात्रै नेपाली कांग्रेसका नेता तथा पूर्वगृहमन्त्री बालकृष्ण खाँण पक्राउ परेका छन्। उनका स्वकीय सचिव नरेन्द्र केसीलाई समेत प्रहरीले पक्राउ गरेकाे छ।

यसअघि सोही प्रकरणमा उपराष्ट्रपति कार्यालयका सचिव टेक नारायण पाण्डे समातिएका छन्। गृह मन्त्रालयका पूर्वसचिवसमेत रहेका उनी पक्राउ पुर्जी जारी भएपछि आफै जिल्ला प्रहरी परिसर टेकुमा पुगेका हुन्। प्रहरीले गृहमन्त्री रामबहादुर थापा बादलका सुरक्षा सल्‍लाहकार डा. इन्द्रजित राईलाई पनि पक्राउ गरेको थियो।

यो प्रकरणमा केशव दुलाल, सानु भण्डारी, टंक गुरुङ, सन्देश शर्मा पोखरेल र सागर थुलुङ लगायत हालसम्म १२ जना पक्राउ परिसकेका छन्। उक्त घटनामा हालसम्म १ सय ६ जनाले २० वटा जाहेरी दिइसकेको प्रहरीले जनाएको छ। पीडितहरुले कुल २३ करोड २५ लाख रूपैयाँ ठगी भएको जाहेरीमा उल्लेख गरेका छन्।