काठमाडौं- सत्तारुढ दल नेकपा (माओवादी केन्द्र) का नेता तथा सांसद देवेन्द्र पौडेलले आगामी आर्थिक वर्षको बजेट चालु वर्षकोभन्दा घटाउन नहुने बताएका छन्। 

आजको प्रतिनिधिसभाको बैठकमा आगामी वर्षको विनियोजन विधेयकका सिद्धान्त र प्राथमिकतामाथिको छलफलमा भाग लिँदै  पौडेलले शिक्षा र स्वास्थ्यमा खर्च बढाउनेगरि बजेट विनियोजन हुनुपर्ने बताए।

अहिले पैसा छैन, त्यसैले बजेट सानो ल्याउनुपर्छ भन्ने जवाफ आइरहेकाले यस्तो गर्न नहुने उनको भनाइ छ। स्रोतको सम्भावनाको अधिक खोजी गरेर भए पनि सरकारले बजेटको आकार घटाउन नहुने उनको भनाइ छ। 

‘संसारका कयौँ देश ऋण लिएर पनि धनी भएका छन्। विदेशबाट अनुदान ल्याउँ। देशभित्र भ्रष्टाचार अन्त्य गरौँ। त्यसैबाट मात्र पनि १ खर्ब रकम आउँछ। यस्ता कयौँ सम्भावना छन् र यसबाट बजेटको आकार घटाउने होइन बढाउँ’, उनले भने।