काठमाडौं- अर्थमन्त्री डा प्रकाशशरण महतले युरोपियनहरूलाई नेपालमा लगानी गर्न आव्हान गरेका छन्।
आजदेखि काठमाडौंमा सुरू भएको ईयू-नेपाल बिजनेस फोरमलाई सम्बोधन गर्दै उच्च प्रतिफलको सम्भावना भएकाले निजी, बहुपक्षीय र द्विपक्षीय लगानीकर्तालाई नेपालमा लगानी गर्न आग्रह गरेका हुन्।
नेपालमा पछिल्लो समय लगानीका लागि धेरै सुविधा थपिएको र यसले गर्दा प्रतिफलको सम्भावना बढाएको उनको भनाइ छ। 'यही कारणले गर्दा अहिले बहुपक्षीय द्विपक्षीय र निजी लगानी आइरहेको छ। हाम्रो नीतिगत सहजताकै कारणले यो आकर्षण भइरहेको छ' उनले भने।
युरोपबाट धेरैभन्दा धेरै निजी लगानीको अपेक्षा गरिएको उनको भनाइ छ। अहिले युरोपियनहरूको लगानी भारतसम्म आएको र त्यसलाई नेपालसम्म विस्तार गर्न उनको आग्रह छ।
लगानी सहजीकरणका लागि पछिल्लो समय सरकारले नीतिगत तथा संस्थागत व्यवस्था गरेको र कुनै पनि लगानीकर्तालाई सहयोग गर्न सरकार सँधै तत्पर रहेको उनको भनाइ छ।