काठमाडौं- कुल गार्हस्थ उत्पादन (जीडीपीमा) दुई तिहाई हिस्सा रहेको सेवा क्षेत्रको वृद्धिदर पछिल्ला तीन वर्षकै न्यून हुने अनुमान गरिएको छ।
राष्ट्रिय तथ्यांक कार्यालयले आज सार्वजनिक गरेको राष्ट्रिय लेखामान प्रक्षेपन अनुसार यो वर्ष सेवा क्षेत्रको वृद्धिदर २.३३ प्रतिशत हुने अनुमान गरिएको छ।
थोक तथा खुद्रा व्यापार, अवास तथा भोजन सेवा, यातायात सञ्चार तथा भण्डारण, वित्तीय मध्यस्थता, घरजग्गा कारोवार, पेशागत तथा प्रशासिनक व्यावसायिक सेवा, सार्वजनिक प्रशासन तथा रक्षा, शिक्षा, स्वास्थ्य र अन्य सेवाहरू यो वर्गमा समेटिन्छन्।
सेवा क्षेत्रको हिस्सा जीडीपीमा ६२.४ प्रतिशत पुग्ने अनुमान कार्यालयले गरेको छ। गत वर्ष यो क्षेत्रको ६१.२ प्रतिशत थियो।
आयात तथा आन्तरिक औद्योगिक उत्पादनहरुमा आएको गिरावटले थोक तथा खुद्रा व्यापारमा ऋणात्मक वृद्धि दर रहेको र यातायात तथा भण्डारण सेवामा पनि न्यून वृद्धिको कारण यस क्षेत्रको कुल मूल्य अभिवृद्धि वृद्धिदरमा गत आवको तुलनामा कमि भएको कार्यालयको विश्लेषण छ।
सेवा क्षेत्रमा सबैभन्दा धेरै हिस्सा ओगट्ने थोक तथा खुद्रा व्यापार यो वर्ष ऋणात्मक हुने प्रक्षेपन गरिएको छ। आयात प्रतिबन्ध तथा खुम्चिँदो मागका कारणले गर्दा खुम्चिएको हो। यही कारणले समग्र सेवा क्षेत्र प्रभावित भएको छ।
सेवा क्षेत्रको विस्तार तीव्र रहेपनि यसअघि २०७६/७७ मा ऋणात्मक भएको थियो। त्यसपछि उच्च लयमा देखिएपनि यो वर्ष फेरि खुम्चिएको छ।
त्यस्तै प्राथमिक क्षेत्र पनि भनिने कृषि तथा वन क्षेत्रको भने यो वर्ष सन्तोषजनक वृद्धिदर कायम भएको छ। सेवा क्षेत्र ऋणात्मक भएको बाहेक अरु वर्षमा न्यून वृद्धिदर हुने कृषि क्षेत्र यो वर्ष भने उच्च दरले विस्तार भएको छ।
गएका तीन वर्षमा कृषिभन्दा गैरकृषि क्षेत्रको वृद्धिदर तीव्र भएपनि यो वर्ष कृषि क्षेत्रको वृद्धिदर उच्च देखिएको छ।
कुन क्षेत्रको हिस्सा कति?