काठमाडौं-  आन्तरिक ऋण भुक्तानीका लागि अर्थ मन्त्रालयले थप रकम निकासा गरेको छ। परिपक्क भएको विकास ऋणपत्रको भुक्तानी गर्नका लागि अर्थले विविध शीर्षकबाट २७ अर्ब रूपैयाँ बजेट थप निकासा गरेको हो। 

अर्थ मन्त्रालयले प्रकाशित गरेको विवरणअनुसार चालु वर्षका लागि विनियोजन गरिएको बजेट अपुग भएपछि थप निकासा गरिएको हो। 

यो वर्षका लागि ऋण भुक्तानीका लागि न्यून बजेट विनियोजन गरिएको थियो। बजेट न्यून भएपछि अर्थले विविध शीर्षकबाट निकासा गरेको हो। 

सरकारले रासायनिक मल खरिदका लागि आवश्यक ३ अर्ब ३२ करोड रुपैयाँ थप निकासा गरेको छ। किसानलाई अनुदानमा मल उपलब्ध गराउनका लागि यो थप रकम निकासा गरिएको हो। यसअघिको विनियोजन अपुग भएपछि अर्थले विविध शीर्षकबाट बजेट निकासा गरेको हो। 

चैतमा मात्र सरकारले १ अर्ब ७९ करोड ८८ करोड रुपैयाँ बजेट रकमान्तर गरेको छ। विभिन्न शीर्षकको बजेट अर्को शीर्षकमा रकमान्तर गरेको हो। खर्च हुन नसकेका शीर्षकबाट आवश्यक आयोजनामा रकमान्तरण गरिएको अर्थले जानकारी दिएको छ। 

त्यस्तै चैतमा बुढिगण्डकी जलविद्युत आयोजनाको ९२ करोड बजेट विभिन्न आयोजनामा रकामान्तर गरिएको छ। यसअघि पनि बुढिगण्डकीको बजेट अन्य आयोजनामा रकमान्तर गरिएको थियो।