काठमाडौं- नेपालको सबैभन्दा ठूलो अटोमोबाइल तथा इन्जिनियरिङ कम्पनीमध्ये एक एमएडब्लू ग्रुप अफ कम्पनिज्ले नेपालमा वितरण गर्दै आएको विभिन्न ब्रान्डका सवारीसाधन र हेभि इक्विपमेन्टको सहज फाइनान्सिङका लागि एभरेस्ट बैंक लिमिटेडसँग समझदारी गरेको छ।
एमएडब्लू ग्रुपले नेपालमा यामाहाका मोटरसाइकल तथा स्कुटर, जेसीबीका मेसिनरी उपकरण, जिप, स्कोडा, फोटन र चांगनका प्यासेन्जर सवारी र आइसर ब्रान्डका कमर्सियल सवारी बिक्री गर्दै आएको छ। एमएडब्लू समूहले हालै आइसरका सवारी बिक्रेताको करिब आधा स्वासमत्व खरिद गरेको थियो।
अब एभरेस्ट बैंकले एमएडब्लू ग्रुपले आयात गर्ने विद्युतीयसहित सवारीसाधनको फाइनान्सिङ ‘फ्लकच्युएसन बेसिस’मा राष्ट्र बैंकले जारी गरेको ‘बेस रेट’मा न्युनतम ३.५ प्रतिशत ब्याजदर तथा डिजेल तथा पेट्रोलबाट चल्ने सवारीसाधनको फाइनान्सिङ ‘बेस रेट’मा ४ प्रतिशत ब्याजदरमा गर्नेछ। यी सबैको ऋण अवधि ७ वर्ष रहनेछ।
मंगलबार आयोजित हस्ताक्षर समारोहमा एमएडब्लूको तर्फबाट भाइस प्रेसिडेन्ट तेज सुवेदी र एभरेस्ट बैंकको तर्फबाट शाखा प्रमुख डिना श्रेष्ठले हस्ताक्षर गगरेका छन्। अब उप्रान्त एमएडब्लूले आयात गर्ने सवारीसाधन तथा हेभि इक्विपमेन्ट खरिद गर्न चाहने ग्राहकले ‘डकुमेन्टेसन’ सकिएको एक सातामा ‘डेलिभरी’ लिन सक्नेछन्।
जिप, स्कोडा र चांगन ब्रान्डका ‘पेसेन्जर भेहिकल’ बेसरेटमा राष्ट्र बैंकले तोकेको ‘बेस रेट’मा थप ४ प्रतिशत (विद्युतीय सवारीसाधनमा ३.५ प्रतिशत) ब्याजदरमा ८० प्रतिशतसम्म फाइनान्स हुनेछ। त्यसैगरी, आइसर, फोटन र चांगन ब्रान्डका कमर्सियल भेहिकललाई पनि एभरेस्ट बैंकले सोही ब्याजदरमा ६० प्रतिशतसम्म फाइनान्स गर्नेछ।
साथै, जेसीबी ब्रान्डका हेभि तथा निर्माण उपकरणलाई पनि एभरेस्ट बैंकले ‘बेस रेट’मा ४ प्रतिशत ब्याज दरमा ७५ प्रतिशतसम्म फाइनान्स गर्ने सहमति पत्रमा उल्लेख छ।
अब एमएडब्लूले नेपालमा बिक्रीवितरण गर्दै आएको सवारीसाधन तथा हेभि उपकरणहरु एभरेस्ट बैंकको नेपालभर फैलिएका एक सय २४ वटा शाखाबाट सहज ढंगमा फाइनान्सिङ हुनेछ।
