काठमाडौं- अल्पकालीन लगानीकर्ताले नाफा बुक गर्दा बुधबार सेयर बजारमा तीव्र उतारचढाव देखिएको छ।

बुधबार बजारमा सबैभन्दा धेरै ब्रोकरहरूले नै सप्लाइ बढाएका छन्। तीव्र गतिमा बजार सुधार हुन थालेपछि एक साताअगाडि सेयर उठाउन थालेका ब्रोकरहरूले नै बिक्री गरेका छन्।

उनीहरूले नाफा बुक गर्दा तीव्र उतारचढावका बीचमा बुधबार १८.०६ अंकले सुधार भएर बन्द भएको छ।

बुधबार नेप्से परिसूचक २७ सय ६९ मा रोकिएको छ। बुधबार ६ अर्ब ६१ करोड रुपैयाँको कारोबार हुँदा १ करोड १५ लाख ९२ कित्ता सेयर किनबेच भएको छ। यसअघि हिजो मंगलबार ७८.८२ अंक र सोमबार ८७.६३ अंकले बढेको थियो।

बजारमा लगानीकर्ताको सक्रियता भने बढेको छ। सूचकमा तीव्र उतारचढवा देखिए पनि कारोबार रकम भने पौने ७ अर्ब रूपैयाँ बराबरको भएको छ। कारोबार रकमले बजार अझै केही समय सुधार हुने अपेक्षा गरिएको छ। चुनावको हल्लाले अहिलेको बजारलाई टेवा दिएको छ।