काठमाडौं- नेपाल टेलिकमले एसईई परीक्षार्थीलाई लक्षित गरी नयाँ अफर ल्याएको छ।
यो अफरअन्तर्गत एसईई परीक्षा दिइरहेका विद्यार्थीले टेलिकमका देशभरका कार्यालयहरुबाट नि:शुल्क सिम प्राप्त गर्न सक्नेछन्। साथै सिममा बोनस अन रिचार्ज पनि उपलब्ध हुने टेलिकमका प्रवक्ता शोभन अधिकारीले जानकारी दिए।
२०७९ चैत २४ देखि सुरू हुने यो अफर ३ महिना (९० दिन) सम्म उपलब्ध हुने टेलिकमले जनाएको छ। टेलिकमका अनुसार बोनस अन रिचार्ज भने ६ महिनासम्म उपलब्ध गराइने छ।
सिमकार्ड प्रयोगमा आउनासाथ ३० दिनसम्मका लागि विभिन्न अफरहरु उपलब्ध हुनेछन्। विद्यार्थीसँग पहिलेदेखि नै नेपाल टेलिकमको सिम छ भने सोही सिममा यी अफरहरु उपयोग गर्न सकिने व्यवस्था गरिएको छ।
नयाँ सिम प्राप्त गरेका विद्यार्थीहरुले सिम कार्डमा मेन ब्यालेन्सको रुपमा उपलब्ध हुने १० रूपैयाँबाट जुनसुकै नेटवर्कमा कल गर्न, एसएमएस पठाउन वा डाटा चलाउन सकिन्छ। साथै एक महिनासम्म जम्मा ४० मिनेट अन नेट कल गर्न, ६० एमबी डाटा चलाउन र ३० वटा अन नेट एसएमएस सहितको सुविधा प्रयोग गर्न सक्नेछन्।
यसका अतिरिक्त यसबाट नेपाल टेलिकमको नेटवर्कभित्र दैनिक २० मिनेट कुराकानी गर्न र १० वटा एसएमएस पठाउन तथा १०० एमबी डाटा प्रयोग गर्न सकिने छ। यस अनुसार ३० दिनसम्म ३ हजार एमबी डाटा, ६ सय मिनेट टकटाइम र ३ सयवटा एसएमएसको सुविधा प्राप्त हुनेछ।
नयाँ सिम प्राप्त गर्नका लागि विद्यार्थीहरुले प्रवेश पत्र वा कक्षा १० को मार्कसिटको फोटोकपी, एकप्रति फोटो र अभिभावकको नागरिकता वा आफ्नो परिचयपत्रको फोटोकपी संलग्न गरी फाराम भर्नुपर्नेछ।
यस अफरअन्तर्गत उपलब्ध हुने बोनस अन रिचार्जमा ५० रूपैयाँ वा सोभन्दा बढी रकम रिचार्ज गर्दा प्रत्येक रिचार्जमा जुनसुकै
समयमा पनि ५ सय एमबी डाटा चलाउन, नेपाल टेलिकमकै नेटवर्कभित्र ५० मिनेट कल र ५० वटा एसएमएस पठाउन सकिने
बोनस सुविधा समेत उपलब्ध हुनेछ।
रिचार्जमा ६ महिनासम्म बोनस सुविधा प्राप्त हुनेछ र बोनस प्राप्त भएको तीन दिनभित्र प्रयोग गरिसक्नु पर्नेछ।