बुधबार, वैशाख ५ गते २०८१    
images
images
images
images

एक हजारबाट सुरू भएको तरकारी खेतीबाट जोडे करोडौँको सम्पत्ति, वार्षिक १२ लाखसम्म आम्दानी

images
बिजनेस न्युज
images
एक हजारबाट सुरू भएको तरकारी खेतीबाट जोडे करोडौँको सम्पत्ति, वार्षिक १२ लाखसम्म आम्दानी

४० वर्ष पहिले ‘विदेश पनि जान्न, जागिर पनि खान्न’ भन्ने अडानका साथ विसं २०३४ सालमा एक हजार रूपैयाँ लगानी गरी कृषि पेसा सुरु गरेका चन्द्रबहादुर कार्कीले अहिले तीन करोड रूपैयाँभन्दा बढी सम्पत्ति आर्जन गरिसकेका छन्।

images

गलेश्वर- म्याग्दीको पर्यटकीयस्थल लभ्लीहिलको पुछारमा चार तले पक्की घर छ। सदरमुकाम बेनीको मंगलाघाटमा घर र घडेरी। २७ रोपनीभन्दा बढी खेतबारी अनि त्यही खेतबारीमा तरकारी नै तरकारी।

images
images
images

पोखरीमा माछा, खोरमा बाख्रा र लभ्लीहिल नजिकै किराना पसल बेनी नगरपालिका-२ खबरास्थित लभ्लीहिलका ५९ वर्षीय चन्द्रबहादुर कार्कीले तरकारी खेतीबाट आर्जेको सम्पत्ति हो यो। 

images

४० वर्ष पहिले ‘विदेश पनि जान्न, जागिर पनि खान्न’ भन्ने अडानका साथ विसं २०३४ सालमा एक हजार रूपैयाँ लगानी गरी कृषि पेसा सुरु गरेका उनले अहिले तीन करोड रूपैयाँभन्दा बढी सम्पत्ति आर्जन गरिसकेका छन्।

images

सँगैका साथी अहिले कृषि वैज्ञानिक, वरिष्ठ कृषि विकास अधिकृतलगयात निजामती सेवाको उच्च तहमा पुगे पनि कार्कीको प्रगति देखेर उनीहरु आश्चर्यमा पर्ने गरेका छन्। १८ वर्षको उमेरदेखि नै कृषि पेसा गर्दै आएका उनी अहिले जिल्लाका नमुना किसान र कृषि पेसाबाट नै सामाजिक सेवामा सक्रिय व्यक्तिका रुपमा चिनिन्छन्। कार्कीले १८ रोपनी जग्गामा मौसमी तथा बेमौसमी तरकारी खेती गरेका छन्। उनी जिल्लामा मिश्रित खेती प्रणाली गर्ने पहिलो किसान हुन्।  

images
images

कार्कीको खेतबारीमा बाह्रैमास आलु, बन्दा, काउली, गोलभेँडा, साग, ब्रोकाउली, धनियाँ, लसुन, प्याज, खुर्सानीलगायत तरकारी र केरा, सुन्तला, कागती, अम्बालगायत फलफूल देखिन्छन्। गोठमा भैँसी, बाख्रा, घर वरपर राखेका मौरीका घारमा मौरी र माछा पालनबाट पनि उनले मनग्गे आम्दानी गर्दै आएका छन्।

‘मैले १८ वर्षको उमेरदेखि तरकारी खेती सुरु गरेको हुँ,’ कार्की भन्छन्, ‘त्यतिबेला मलाई जागिर खान वा विदेश जानका लागि धेरै आग्रह गरिएका थिए, तर मैले जागिर पनि नखाने र विदेश पनि नजाने अड्डी लिएर कृषि पेसा सुरु गरेँ। एक हजार लगानीबाट सुरु गरेको व्यावसायिक तरकारी खेतीबाट वार्षिक १२ लाख रूपैयाँभन्दा बढी कमाइ हुने गरेको छ।’  

‘तरकारी बिक्रीबाट आएको आम्दानीले बेनी बजारको मंगलाघाटमा घडेरी किनेर घरसमेत बनाएको छु। लभ्लीहिलमा चारतले पक्की घर हालै निर्माण गरेको हुँ’, उनी भन्छन्, ‘माछा, कुखुरा र घरभाडाबाट हुने आम्दानी तथा पसलबाट हुने फाइदा मेरा आम्दानीकमा स्रोत हुन्।’

माटोसँग खेल्दा र पसिना चुहाउँदा निकै आनन्दको अनुभूति हुन्छ। यही माटोमा गरेको परिश्रमले यहाँसम्म ल्याइपुर्‍याएको हो। यिनै पसिना विदेशी भूमिमा खर्च गरेको भए न यत्तिको कमाउन सक्थेँ, न आत्मसन्तुष्टि नै मिल्ने उनको भनाइ छ। 

खबराको पिपलडाँडाको तल्लोपट्टि पर्यटकीयस्थल लब्लीहिलको नजिकै रहेको उनको खेतबारी कृषिको प्रयोगशालाजस्तो देखिने स्थानीय तेजेन्द्रबहादुर कार्की बताउँछन्। सधैँभरि तरकारी र फलफूलले हरियाली देखिने कार्कीको नर्सरी, तरकारी खेती र केराबारी हेर्नका लागि यहाँ पुगेका आन्तरिक तथा बाह्य पर्यटक उनको घरसम्म पुग्ने गरेका छन्। रासस 

images

प्रकाशित : बिहीबार , चैत १६ २०७९०८:४०
प्रतिक्रिया दिनुहोस