काठमाडौं- अनलाइन व्यापारको नाममा मोबाइल एप्पलिकेशन ह्वाट्सएप र टेलिग्रामबाट करोडौंँ रूपैयाँ ठगी गरेको आरोपमा ९ जना चिनियाँ नागरिकसहित १९ जना पक्राउ परेका छन्। 

टेलिग्राममार्फत अनलाइन कक्षा सञ्चालन गर्ने भन्दै १० करोड बढी ठगीको आरोपमा बुढानीलकण्ठ नगरपालिका-२ महादेवखोला र चण्डोलबाट ९ जना चिनियाँ र १० नेपालीलाई पक्राउ गरिएको उपत्यका अपराध अनुसन्धान कार्यालयले जनाएको छ। 

पक्राउ पर्नेहरूमा चिनयाँ नागरिकहरु: नागरिक हुङ हुएरङ, छु फिजाङ, लान हेङवी, सि गुए यी, सि, सुआङ दी लगायत छन् भने नेपाली नागरिकहरुमा बुद्धिराज श्रेष्ठ, इन्द्र तामाङ, राजकुमार लामा, प्रयास भण्डारी, अर्जुन श्रेष्ठ, अनिता मगर लगायत छन्। 

उनीहरूले काठमाडौंका विभिन्न स्थानमा घर भाडामा लिएर अवैध रुपमा कार्यालय सञ्चालन गरी अनलाइनमार्फत ठगी गरेको पाइएको हो। उनीहरुले अनलाइनमार्फत बिजनेसबाट ठूलो रकम फाइदा हुने भन्दै ठग्ने गरेको प्रहरी अनुसन्धानमा खुलेको छ।

प्रहरीले उनीहरुको साथबाट चार लाख नगद, ७७ थान फोन, १२ थान ल्यापटप लगायतका सामान पनि बरामद गरेको छ।