काठमाडौं- चालु आर्थिक वर्ष २०७८/०७९ पहिलो २ महिना १ लाख २० हजार ७ सय १५ ऋणीलाई राष्ट्र बैंकले सहुलियत दरमा प्रदान गर्दै आएको पुनरकर्जा रकममा १ खर्ब १८ अर्ब ८५ करोड लगानी गरेको छ। 

ऋणीलाई सहुलियतपूर्ण कर्जा प्रवाह भइ १ खर्ब ८७ अर्ब १६ करोड कर्जा बक्यौता रहेको बैंकले जनाएको छ। यसमध्ये कृषि तथा पशुपक्षी व्यवसाय कर्जा अन्तर्गत ५१ हजार २ सय ७२ ऋणीलाई प्रवाह भएको १ खर्ब २१ अर्ब ६ करोड कर्जा रहेको छ।

यसैगरी महिला उद्यमशील कर्जा अन्तर्गत ६६ हजार ६ सय ९० महिला उद्यमीलाई ६२ अर्ब ३७ करोड रुपैयाँ कर्जा प्रभाव भएको छ।सहुलियतपूर्ण कर्जाका अन्य शीर्षक अन्तर्गत २ हजार ७ सय ५३ ऋणीको ३ अर्ब ७३ करोड कर्जा बक्यौता रहेको बैंकले जनाएको छ। 

व्यावसायिक निरन्तरता कर्जा प्रवाह कार्यविधि, २०७७ बमोजिम कोभिड-१९ प्रभावित पर्यटन र घरेलु, साना तथा मझौला उद्यम क्षेत्रको व्यवसाय निरन्तरतामा सहयोग पुर्‍याउन ती क्षेत्रका श्रमिक तथा कर्मचारीको पारिश्रमिक भुक्तानीका लागि व्यवस्था गरिएको कर्जा २०७८ भदौ मसान्तसम्ममा१ अर्ब स्वीकृत भएको बैंकले जनाएको छ।