 (2).gif)
काठमाडौं- नेपालको संविधानले महिलालाई अधिकार सम्पन्न बनाएपछि सम्पत्तिमा समेत उनीहरुको स्वामित्व क्रमशः वृद्धि हुँदै गएको पाइएको छ। राष्ट्रिय जनगणना २०७८ को विवरणअनुसार कुल २३ दशमलव आठ प्रतिशत परिवारमा महिलाको नाममा घर जग्गा रहेको पाइएको छ। जुन २०६८ को तुलनामा एक दशमलव एक प्रतिशतले बढी हो।
देशभर कुल ६६ लाख ६६ हजार नौसय ३७ परिवार संख्या रहेको छ। आवासीय घर भने कुल ६६ लाख ६० हजार आठसय ४१ रहेको छ। त्यसमध्ये घर तथा आवासीय इकाइको स्वामित्वमा समेत महिलाको सहभागितामा वृद्धि भएको छ। कुल ३१ दशमलव ५५ प्रतिशत परिवारमा परिवारमूली महिला रहेको विवरणमा उल्लेख छ। जुन २०६८ को तुलनामा पाँच दशमलव ८२ प्रतिशत बढी हो।
कुल दुई करोड ९१ लाख ६४ हजार पाँच सय ७८ जनसंख्या रहेकामा महिलाको संख्या एक करोड ४९ लाख ११ हजार २७ जना महिला छन्। त्यस्तै, एक करोड ४२ लाख ५३ हजार पाँच सय ५१ पुरुष छन्।
लैंगिक अनुपातमा हेर्दा कुल एकसय जना महिलामा पुरुषको संख्या ९५ दशमलव ५९ छ। विसं २०६८ को कुल जनसंख्या दुई करोड ६४ लाख ९४ हजार पाँच सय चार रहँदा त्यस्तो लैंगिक अनुपात ९४ दशमलव १६ थियो।
