काठमाडौं- नेपाल राष्ट्र बैंकले चाँदी आयात खुकुलो बनाइदिएको छ। राष्ट्र बैंकले चाँदी आयातका दिइने विदेशी मुद्राको विनिमय सुविधा र परिमाणको सीमा केही खुकुलो बनाइदिएको हो। 

राष्ट्र बैंकले एकीकृत निर्देशन २०७८ मा संसोधन गर्दै चाँदी आयातका लागि दिइने भुक्तानी सुविधाको सीमा ३५ हजार अमेरिकी डलरबाट ६० हजार बनाइदिएको छ। 

यसअघि गत वर्ष राष्ट्र बैंकले यस्तो सुविधा ३५ हजार डलरमा सीमित बनाइदिएको थियो। चाँदीका गहना निर्यात गर्नेहरूका हकमा भने यस्तो सीमा लागु नहुने भएको छ। चाँदीका गहना बनाएर बिक्री गर्नेका लागि निर्यातको यकिन भएपछि भुक्तानीको सीमा लागू हुने छैन। 

त्यस्तै यस्ता गहना बनाएर निर्यात गर्नेका लागि मासिक चाँदी खरिदको सीमा पनि नलाग्ने भएको छ। महिनामा चाँदीको व्यवसाय गर्नेहरूले प्रक्रिया पूरा गरेपछि १ किलोग्राम चाँदी खरिद गर्नसक्ने व्यवस्था रहेको छ। तर गहना बनाएर निर्यात गर्नेका लागि यो सीमा लागु नहुने भएको छ। 

गत वर्ष विदेशी मुद्राको सञ्चिति घट्दै गएपछि राष्ट्र बैंकले सुन र चाँदीको आयातमा कडाइ गरेको थियो। सुन चाँदी आयाका लागि भुक्तानीदेखि सीमा पनि घटाएको थियो।