काठमाडौं- चालु आर्थिक वर्ष २०७९/८० को ८ महिनामा कुल १० खर्ब ५८ अर्ब रुपैयाँ बराबरको सामान आयात भएको छ। 

चालु आवको साउनदेखि फागुन मसान्तसम्ममा सरकारले भारत लगायत तेस्रो मुलुकबाट सो रकम बराबरको सामान आयात गरेको हो। आयातको तुलनामा निर्यात भने न्यून छ। ८ महिनामा १ खर्ब  ४ अर्ब रुपैयाँ बराबरको मात्रै सामान निर्यात भएको छ।

गत आवको सोही अविधिको तुलनामा चालु आवमा आयात र निर्यात दुवै घटेको हो। भन्सार विभागका अनुसार आयात १९.१३ र निर्यात २९.०७ प्रतिशतले घटेको हो। गत आवको सोही अविधिमा नेपालले १३ खर्ब ८ अर्ब रुपैयाँ बराबरको सामान आयात गरेको थियो भने १ खर्ब ४७ अर्ब रुपैयाँ बराबरको सामान निर्यात गरेको थियो।

यसैगरी चालु आवमा कुल वैदेशिक व्यापारमा पनि २० प्रतिशतले कमी आएको छ। गत आवको सोही अविधिमा कुल १४ खर्ब ५६ अर्बको वैदेशिक व्यापार भएको थियो। चालु आवमा भने ११ खर्ब ६३ रुपैयाँको वैदेशिक व्यापार भएको छ।

व्यापार घाटा १७ प्रतिशतले घटेको भन्सार विभागले जनाएको छ।