काठमाडौं- अर्थ मन्त्रालयले ठूला करदाता कार्यालय र मध्यमस्तरीय करदाता कार्यालयका प्रमुख परिवर्तन गरेको छ। ठूला करदातामा सहसचिव शिवलाल तिवारीलाई पठाइएको छ भने मध्यमस्तरीय करदाता कार्यालयमा शम्भु मरासिनीलाई पठाइएको छ। 

अर्थमन्त्री जनार्दन शर्माले मन्त्रालय आउनेबित्तिकै सहसचिव बाबुराम गौतमलाई त्यहाँबाट हटाएका थिए। अहिले मध्यमस्तरीयका अर्जुन भट्टराईलाई हालै हटाइएको हो। 

ठूलामा पठाइएका तिवारी माओवादी निकट कर्मचारी हुन्। तत्कालीन अर्थमन्त्री वर्षमान पुनको पालामा निजी सचिव रहेका तिवारी यसअघि राजस्व अनुसन्धान विभागमा उपमहानिर्देशक थिए। उनलाई त्यहाँबाट तानेर ठूला करदातामा पठाइएको हो। 

मध्यमस्तरीयमा पठाइएका मरासिनी हालका अर्थसचिव मधुकुमार मरासिनीका सहोदर भाइ हुन्। आन्तरिक राजस्व विभागका उपमहानिर्देशक रहेका उनी त्यसअघि त्रिभुवन अन्तर्राष्ट्रिय विमानस्थल भन्सार कार्यालयका प्रमुख थिए। 

अर्थ मन्त्रालयले सहसचिवसँगै दसैँको ठीक अघि राजस्व समूहका ७० भन्दा धेरै उपसचिको सरुवा गरेको थियो।