काठमाडौं- यती एयरलाइन्सले अन्तर्राष्ट्रिय उडानको अनुमति पाएको छ।
नेपाल नागरिक उड्डयन प्राधिकरणले यतीलाई अन्तर्राष्ट्रिय उडानको अनुमति दिएको हो। यतीलाई यसअघि नै सरकारले अन्तर्राष्ट्रिय उडानका लागि लाइसेन्स दिइसकेको थियो।
प्राधिकरणले यतीलाई नियमित बाहेकको अन्तर्राष्ट्रिय उडानको अनुमति दिएको हो। यस्तै प्रकृतिको अनुमति यसअघि श्री एयरलाइन्सले पाएको थियो। यतीले दक्षिण तथा दक्षिणपूर्वी एसिया क्षेत्रमा उडानका लागि अनुमति पाएको हो।
७२ सिट क्षमताका एटिआर-७२ बाट आन्तरिक उडान गरिरहेको यतीले अन्तर्राष्ट्रिय उडान पाएसँगै उडानको योजना बनाएको छ।
कार्गो तथा यात्रु चार्टर्ड उडानका लागि यतीको पहिलो प्राथमिकता रहेको छ। उसले लामो दूरीभन्दा पनि नेपालका छिमेकी मुलुकरुमा उडान गर्ने योजना बनाएको छ।
'कुनै निश्चित गन्तव्यभन्दा पनि हामीले अनुमति पाएका देशहरुमा मागको आधारमा उडानको योजना बनाउँछौँ' यतीका प्रवक्ता सुदर्शन बर्तौलाले भने।
नेपालसँग छोटो दुरीमा भारतका विभिन्न राज्यहरुमा यतीको मुख्य टार्गेट रहेको छ।
