काठमाडौं- काठमाडौं बबरमहलस्थित वाणिज्य विभागमा आउने सेवाग्राहीलाई काम छिटो छरितो गरीदिन्छु भनि रकम माग गरी दु:ख दिएको भन्दै प्रहरीले तीन जनालाई पक्राउ गरेको छ।
बिचौलियाको काम गरी सर्वसाधारणलाई दु:खहैरानी दिने काममा संलग्न रहेको अभियोगमा उनीहरूलाई बुधबार दिउँसो पक्राउ गरेको प्रहरीले जनाएको छ।
पक्राउ पर्नेहरूमा उदयपुर ताप्लिङ गाउँपालिका-५ घर भइ काठमाडौं कागेश्वरी मनोहरा नगरपालिका-९ बस्ने ५१ वर्षीय क्षेत्र बहादुर खड्का, रामेछाप रामेछाप नगरपालिका-९ घर भइ भक्तपुर सूर्यबिनायक नगरपालिका-२ बस्ने ३४ वर्षीय राज लामा र उदयपुर ताप्लिङ गाउँपालिका-५ घर भइ भक्तपुर मधयपुर ठिमी नगरपालिका-१ बस्ने २९ वर्षीय निरज बुढाथोकी रहेका छन्।
विशेष सूचनाको आधारमा प्रहरी वृत्त सिंहदरबारबाट खटिएका प्रहरीले सोधपुछ गर्ने क्रममा उल्टै प्रहरी कर्मचारीसँग विवाद तथा हो-हल्ला गरी अशान्ति सिर्जना गरेपछि उनीहरूलाई पक्राउ गरेको प्रहरीले जनाएको छ।
उनीहरूउपर अभद्र व्यवहार गर्न नहुनेसम्बन्धी कसुरमा जिल्ला प्रशासन कार्यालय काठमाडौंबाट ५ दिन म्याद थप अनुमति लिइ प्रहरी वृत्त सिंहदरबारबाट थप अनुसन्धान भइरहेको प्रहरीले जनाएको छ।
