काठमाडौं- आन्तरिक उडानमा सबैभन्दा धेरै बजार हिस्सा ओगट्न सफल बुद्ध एयरका प्रबन्ध निर्देशक वीरेन्द्रबहादुर बस्नेतले सुरक्षित हवाई यात्राका लागि गर्नुपर्ने लगानीमा कुनै कमी नगर्ने प्रतिबद्धता गरेका छन्।

उड्डयन बिजनेसमा सुरक्षाका लागि गरिने लगानी नै सबैभन्दा लाभ हो। 'सुरक्षाका लागि गर्नुपर्ने कुनै पनि विषयमा बुद्ध एयरले कन्ज्युस्याइँ गर्दैन,' बस्नेतले भने, 'हामीले वार्षिक ३ अर्बभन्दा बढी रकम जहाज मर्मत तथा सुरक्षाका उपायहरू अवलम्बन गर्न खर्चिरहेका छौँ। जहाज मर्मतका लागि प्रयोग हुने ह्याङगरमा मात्रै पौने ३ अर्ब रुपैयाँको लगानी भइसकेको छ।' 

सन् २०११ को दुर्घटनापछि नै बुद्ध एयरले सुक्ष्म र मिहीन ढंगले अपरेशन, इन्जिनियरिङ, जनशक्ति तथा बजार व्यवस्थापनका लागि राष्ट्रिय तथा अन्तर्राष्ट्रिय ख्याति प्राप्त जनशक्ति प्रयोग गरेको उनले बताए। 'सन् २०११ सेप्टम्बर २५ को बुद्धको पहिलो दुर्घटनापछि हामीले सुक्ष्म र मिहीन ढंगले इञ्जिनियरिङ,अपरेशन, ग्राउण्ड ह्याण्डलिङ, जनशक्ति, वित्त तथा बजार व्यवस्थापनजस्ता हरेक तप्कामा राष्ट्रिय तथा अन्तर्राष्ट्रिय प्रावधान अनुरुपको कार्य एवं प्रणाली अँगालेका छौँ,’ उनले भने।

बुद्ध एयरले नाफालाई कहिल्यै पनि पहिलो प्राथमिकतामा नराखेको समेत उनको भनाइ छ। बुद्ध एयरले नागरिक उड्डयन क्षेत्रसँग जोडिएको सबै नियामक निकायले तोकेको मापदण्डमा कुनै पनि कमजोरी नगरेको र अबको दिनमा पनि कमजोरी हुन नदिने बस्नेतले बताए।

आफूहरूले कर्मचारीको तालिम तथा क्षमता अभिवृद्धिमै वर्षमा १ अर्ब रुपैयाँसम्म खर्च गरेको उनको दाबी छ। तर कुनै कसैको केही गल्तिमा सबैलाई एउटै तराजुमा राख्न नहुने बुद्ध एयरको भनाइ छ। आफूहरूले हवाई क्षेत्रमा अर्बौं लगानी गरेका कारण अन्यत्र अहिले नै डाईभर्ट नहुने समेत बस्नेतको भनाइ छ।

हामी पारदर्शी भएर नै यहाँसम्म आइपुगेका हौँ, यात्रुलाई सबै सूचना दिएका छौँ : वीरेन्द्रबहादुर बस्नेत [अन्तर्वार्ता]