काठमाडौं- पोखरामा दुर्घटनामा परेको यतीको नाइन एन-एएनसी एटीआर-७२ जहाज चरासँग ठोक्किएर दुर्घटनामा परेको आशंका गरिएको छ। नेपालमा पहिलोपटक एटीआर-७२ जहाज दुर्घटना भएको हो।

यही दुर्घटनामा परेको जहाज नै भर्खरै निर्माण सम्पन्न भएर उद्‍घाटन गरिएको पोखरा अन्तर्राष्ट्रिय विमानस्थलमा पहिलोपटक अवतरण गरेको जहाज हो। यही जहाजमार्फत २२ डिसेम्बरका दिन पोखराको पुरानो विमानस्थलबाट नयाँ विमानस्थलमा डेमो उडान गरिएको थियो। 

उक्त जहाज पोखरा विमानस्थलमा अवतरण गर्ने क्रममा आइतबार बिहान पुरानो एयरपोर्ट र नयाँ एयरपोर्टको बीचमा रहेको सेती किनारमा दुर्घटना भएको हो।

क्याप्टेन कमल केसीले उडाएको जहाज बिहान १० बजेर ५१ मिनेटमा दुर्टघनामा परेको हो। नयाँ विमानस्थलनजिक फोहोरका कारण धेरै चिलहरू उड्ने गरेका छन्। फोहोर व्यवस्थापन गर्ने स्थान अहिले हटाइएको भएपनि चराहरू भने अझै त्यहाँ वरपर हट्न सकेको थिएन। 

जहाज काठमाडौंबाट ६८ जना यात्रु लिएर उडेको थियो। उडानमा चालक दलका चारजना थिए।