काठमाडौं- सेयर कारोबार घटेसँगै वित्तीय संस्थाहरुबाट हुने डिजिटल पेमेन्टको भुक्तानीसमेत घटेको छ। नेपाल राष्ट्र बैंकका अनुसार असार महिनादेखि नै लगातार डिजिटल भुक्तानी घटेको हो।
कोरोना महामारीमा व्यापक रुपमा बढेको डिजिटल भुक्तानी गत वर्षको मंसिर महिनादेखि नै ओरालोमा लागेको हो। गतवर्षदेखि नै ओरालो लागेको सेयर बजारका कारण डिजिटल भुक्तानीसमेत घटेको देखिएको छ। पछिल्लो महिना कात्तिकमाा ३९ खर्ब ४६ अर्ब १९ करोड ४० लाख रुपैयाँ बराबरको डिजिटल भुक्तानी भएको थियो। गत वर्षको कात्तिकमा डिजिटल भुक्तानी ४९ खर्ब ३१ अर्ब ९२ करोड ५० लाख रुपैयाँ थियो।
चालु आर्थिक वर्षको असोजमा ४६ खर्ब ५ अर्ब ३१ करोड ६० लाख रुपैयाँ बराबरको भुक्तानी भएको छ। त्यस्तै भदौमा ४९ खर्ब २६ अर्ब ७१ करोड ७० लाख रुपैयाँको डिजिटल भुक्तानी भएको थियो। राष्ट्र बैंकका प्रवक्ता गुणकर भट्ट डिजिटल भुक्तानीमा उतारचढाव आइरहेने बताउँछन्।
‘सेयर कारोबारासँगै अन्य कारोबार पनि घटेका कारण डिजिटल भुक्तानी घटेको हुनसक्छ,’ भट्टले भने। यो अल्पकालिन मात्रै घट्दो भएकोले आगामी दिनमा बढ्नेनै डिजिटल भुक्तानी भएको समेत उनको भनाइ छ।
साउनमा ५६ खर्ब ८८ अर्ब ६२ करोड ७० लाख रुपैयाँको भुक्तानी भएको थियो। उता गत वर्षको असारमा ६२ खर्ब २७ अर्ब ६४ करोड ७० लाख रुपैयाँको डिजिटल भुक्तानी भएको थियो। मोबाइल बैंकिङको भुक्तानी संख्या भने केही बढेको छ।
गतवर्षको कात्तिकमा मोबाइल बैंकिङ १ करोड २६ लाख १५ हजार ६ सय १७ पटक भएको थियो। तर चालु वर्ष बढेर कात्तिकमा २ करोड ५ लाख ८ हजार २९ पटक कारोबार भएको राष्ट्र बैंकको तथ्यांकमा छ। भुक्तानीको रकम भने घटेको छ।
गतवर्षको कात्तिकमा १ खर्ब ६२ अर्ब १३ करोड ७० लाख रुपैयाँको भुक्तानी भएकोमा चालु आर्थिक वर्षको कात्तिकमा १ खर्ब ५१ अर्बै ९८ करोड ७० लाख रुपैयाँको मात्रै भुक्तानी भएको राष्ट्र बैंकको तथ्यांकमा रहेको छ। कनेक्ट आईपीएसबाट हुने पनि कारोबार संख्या बढेता पनि भुक्तानी रकम भने घटेको छ।
तथ्यांकअनुसार गतवर्षको कात्तिकमा कनेक्ट आईपीएसबाट २ करोड ७६ लाख ५ सय ३ वटा कारोबार भएको थियो। तर चालु वर्षको कात्तिकमा ३ करोड ६४ लाख ५५ हजार ९५ वटा कारोबार भएको छ। इन्टरनेट बैंंकिङ कारोबार पनि घटेको तथ्यांक छ।
गत वर्षको कात्तिकमा २ लाख ५० हजार १ सय ७७ कारोबार भएकोमा चालु वर्षको कात्तिकमा २ लाख ३४ हजार १ सय ७ कारोबार मात्रै भएको छ। गतवर्ष ११ अर्ब ९ करोड रुपैयाँ भुक्तानी भएकोमा चालु वर्षको कात्तिकमा ११ अर्ब ७ करोड रुपैयाँको मात्रै भुक्तानी भएको छ।
