काठमाडौं- लगातार घटिरहेको सेयर बजारमा सोमबारको कारोबारमा सामान्य वृद्धि देखिएको छ। गएको साता ३४.६७ अंकको गिरावट देखिएको बजारमा यो साता आइतबार नै २७.५४ अंकको गिरावट देखिएको थियो।

सोमबार ३.८३ अंकको वृद्धिसँगै बजार १८५८.८९ बिन्दुमा पुगेको छ। ८८ करोड ६० लाख ९८ हजार रुपैयाँको कारोबार हुँदा १२५ कम्पनीको सेयर मूल्य बढेको छ। 

लगातार भइरहेको गिरावटले थामिने बिन्दु भेटिन कठिन देखिइरहँदा सोमबार सामान्य वृद्धि देखिएको हो। उतारचढावपूर्ण बजारमा देखिएको अवस्थाले नयाँ सरकार नआउँदासम्म उही शैलीमा रहने देखिन्छ। लगानीकर्ताहरू नयाँ सरकार गठनपछि हुने नीतिको पर्खाइमा देखिएको विश्लेषकहरू बताउँछन्। अब बन्ने सरकार र त्यसमा अर्थमन्त्रीसहित उनको नीतिगत विश्वस्तताको पर्खाइ लगानीकर्तामा रहेको उनीहरूको भनाइ छ।