काठमाडौं- सार्वजनिक संस्थान सञ्चालनको विषयलाई लिएर अर्थमन्त्री र राष्ट्रिय योजना आयोगका उपाध्यक्षको धारणा बाझिएको छ।
अर्थमन्त्रालयले प्रेषण गरेको विज्ञप्तिमै यो विषयमा दुईजनाको फरक धारणा सार्वजनिक भएको हो।
विज्ञप्तिमा बन्द अवस्थामा रहेका सरकारी उद्योगहरु सञ्चालन गर्ने रहेको र गर्नुपर्ने अर्थमन्त्री जनार्दन शर्माको भनाइ उल्लेख गरिएको छ।
'मन्त्री शर्माले हाल बन्द रहेका सरकारी स्वामित्वका उद्योगहरु संचालन गर्ने गरी तयारी भैरहेको जानकारी समेत दिनुभयो । धागो उद्योग, कपडा उद्योग, रबर उद्योग, चुरोट कारखानालगायतका बन्द अवस्थाका उद्योगहरु नयाँ मोडालिटी बनाएर संचालन गरिने उहाँले बताउनुभयो' मन्त्रालयले प्रकाशन गरेको विज्ञप्तिमा उल्लेख गरिएको छ।
तर सोही विज्ञप्तिमा राष्ट्रिय योजना आयोगका उपाध्यक्ष डा विश्वनाथ पौडेलले उत्पादक नहुने संस्थानहरुको सञ्चालनमाथि प्रश्न उठाएको उल्लेख गरिएको छ।
'यस्तै डा. पौडेलले मुलुकको राजश्वमा योगदान गर्न नसक्ने सार्वजनिक संस्थानहरुको औचित्यमा प्रश्न उठाउनुभयो' विज्ञप्तिमा उल्लेख गरिएको छ।
