काठमाडौं- तीन महिनामै दुई पुनर्बीमा कम्पनीले २७ अर्ब ७७ करोड ४० लाख लगानी गरेका छन्। नेपाल पुनर्बीमा कम्पनी लिमिटेड र हिमालयन रि इन्स्योरेन्सले चालु आर्थिक वर्षको पहिलो तीन महिनामा २७ अर्ब ७७ करोड ४४ लाख रुपैयाँ लगानी गरेका हुन्।

नेपाल पुनर्बीमा कम्पनीले २० अर्ब १ करोड ४ लाख रुपैयाँ र हिमालयन रिले ७ अर्ब ७६ करोड ४० लाख रुपैयाँ गरी सो बराबरको रकम विभिन्न क्षेत्रमा लगानी गरेका हुन्।

दुबै पुनर्बीमा कम्पनीले कुल लगानीको ८५.९२ प्रतिशत अर्थात २३ अर्ब ८६ करोड ४४ लाख रुपैयाँ बैंक तथा वित्तीय संस्थाहरुको मुद्दती निक्षेपमा लगानी गरेका छन्।

नेपाल पुनर्बीमा कम्पनीले १४ अर्ब ८१ करोड १२ लाख रुपैयाँ र हिमालयन रिले ७ अर्ब ९ करोड रुपैयाँ गरी २१ अर्ब ९० करोड १२ लाख रुपैयाँ ‘क’ वर्गको बैंक तथा वित्तीय संस्थाको मुद्दती निक्षेपमा लगानी गरेका हुन्। यस्तै ‘ख’ वर्गको विकास बैंकको मुद्दती निक्षेपमा नेपाल पुनर्बीमाले मात्रै १ अर्ब ९६ करोड ३१ लाख रुपैयाँ लगानी गरेको छ।

हिमालय रिले ‘क’ वर्गको वाणिज्य बैंकको मुद्दती निक्षेपमा ७ अर्ब ९ करोड रुपैयाँ, क, ख, ग वर्गको बैंक तथा वित्तीय संस्थाको अग्राधिकार सेयर र ऋणपत्रमा ६३ करोड ४० लाख रुपैयाँ र म्युचअल फण्ड तथा नागरिक लगानी कोषमा ४ करोड रूपैयाँ गरी कुल ७ अर्ब ७६ करोड ४० लाख रुपैयाँ मात्रै लगानी गरेको छ।

दुबै कम्पनीले लगानी निर्देशिका अनुसार नेपाल पूर्वाधार बैंकको मुद्दती निक्षेप,‘ग’ वर्गको बैंक तथा वित्तीय संस्थाको मुद्दती निक्षेपमा, घरजग्गामा, सूचीकृत पब्लिक कम्पनीको सुरक्षित डिबेन्चरमा, कृषि पर्यटन र जलस्रोत लगायतका पूर्वाधारमा भने लगानी गरेका छैनन्।