काठमाडौं- धितोपत्र बजारमा चुनावपछि सेयर कारोबार उत्साहजनक देखिन सकेको छैन। धामधम मत परिणामहरु आइरहदाँ कस्तो सरकार बन्ने भन्ने अन्योल कायम रहेको छ। जसका कारण पनि लगानीकर्ता पर्ख र हेरको अवस्थामा रहेका छन्।
गएको आइतबार भएको प्रतिनिधिसभा र प्रदेशसभाको निर्वाचनपछि बजारले लय समात्ने विश्लेषण विपरीत बजार राताम्य भइरहेको बजार साताको अन्तिम दिन बिहीबार भने थोरै अंकले सुधार देखिएको छ। चुनावपछि आर्थिक सूचकले साथ दिने र सेयर बजारमा उत्साह आउने अनुमानकाबीच बजार बढ्न सकेको छैन।
बिहीबार ११.५६ अंकको दोहोरो सुधार देखिएको छ। नयाँ सत्तासमिकरणलाई स्वागत गर्नेगरी बजार केही बढेको छ। बिहीबार १९३३.५५ विन्दुमा पुगेको छ। भने ९२ करोडको कारोबार समेत भएको छ। बिहीबार १२४ कम्पनीको सेयर मूल्य बढेको छ। भने ४९ कम्पनीको सेयर मूल्य घटेको छ।
मंगलबार ७.१३ अंकले घटेर बजार १९२९.७० बिन्दुमा झरेको बजार बुधबार पनि घटेको थियो। बुधबार ७.७२ अंकले घटेर बजार १९२१.९९ बिन्दुमा झरेको छ। बुधबार १ अर्ब २ करोड रुपैयाँको कारोबार भएको थियो।
वैदेशिक मुद्राको सञ्चितिमा वृद्धि भएको, शोधनान्तर नाफामा रहेको तथा विप्रेषण आप्रवाहमा उल्लेख्य सुधार भएलगायतका कारणले पनि मुलुकको अर्थतन्त्रमा सुधार हुँदै गएको देखिन्छ। तर चुनावी परिणामले सिर्जना गर्नसक्ने सरकार गठनको अन्योलताले सेयर बजारमा प्रभाव परेको विश्लेषकहरू बताउँछन्। मिश्रित चुनावी मतपरिणामले सेयर लगानीकर्तामा झनै अन्योल थपिँदा सेयर बजार बढ्न सकेन।
पछिल्ला दिनमा निर्वाचनको माहोलमा सकारात्मक प्रभाव देखिएको बजारमा चुनावको सुरुवाती परिणाम आइरहँदा त्यसको सकारात्मक प्रभाव देखिएको छैन। मिश्रित चुनावी परिणामले सेयर लगानीकर्तामा झनै अन्योल थपिएको विश्लेषकहरू बताउँछन्। अब बन्ने नयाँ सरकार र अर्थमन्त्री हेरेर मात्रै बजारमा गति अनुमान गर्न सकिने विश्लेषकहरू बताउँछन्।
