काठमाडौं- नेपाल वायुसेवा निगम (नेपाल एयरलान्स) व्यवस्थापनले इन्जिन बिग्रिएर जहाज ग्राउन्डेड भएको ३७ दिनपछि बल्ल इन्जिन मर्मतको प्रक्रिया सुरु गरेको छ।
निगमको न्यारोबडी, एयर बस ३२० कलसाइन नाइन एन एकेडब्लु (सगरमाथा) साउन १४ गतेबाट ग्राउन्डेड छ। जहाजको दायाँ इन्जिनमा समस्या आएर ग्राउन्डेड भएको थियो।
ग्राउन्डेड जहाजको बायाँ इन्जिनमा पनि डिसेम्बरमा समस्या देखिएर ७० दिन ग्राउन्डेड भएको थियो। बायाँ इन्जिन मर्मतका लागि इजारायल पठाइए पनि अहिलेसम्म इन्जिन ल्याइएको छैन। पुन: साउन १४ गते बिग्रिएको इन्जिन मर्मतका लागि ३७ दिनपछि टेन्डर गरिएको हो।
निगमले एयरबस ग्राउन्डेड हुँदा दैनिक १ करोड ११ लाख रुपैयाँभन्दा बढी आम्दानी गुमाइरहेको छ।
न्यारोबडी जहाज ग्राउन्डेड हुँदा निगमले दैनिक एक करोड रुपैयाँभन्दा बढी आम्दानी गुमाइरहेको निगम अर्थ विभागकै कर्मचारीहरू बताउँछन्।
निगमको एयर बस ३२० जहाजको प्रति घण्टा चार्टर रेट ७ हजार ७ सय १० डलर निर्धारण भएको छ। अहिले निगमको उडानमा रहेको अर्को एयर बस ३२० जहाजले दैनिक ११ घण्टा उडान गरिरहेको छ।
सोही हिसाब निगमले एयर बस ३२० सगरमाथा ग्राउन्डेड हुँदा आम्दानी दैनिक ८४ हजार ८ सय १० डलर आम्दानी गुमाइरहेको छ।
