भोजपुर- ग्रामीण क्षेत्रसम्म सडक सञ्जाल र यातायातको पहुँच विस्तार भएसँगै भोजपुरका दुर्गम गाउँमा पालिएका खसीबोकाले सहजरूपमा बजार र उचित मूल्य पाउन थालेका छन्।

यातायातको सहजतासँगै स्थानीयस्तरमा उत्पादन भएका खसीबोका ठूला सहरमा जान थालेपछि किसानलाई बेचबिखनमा पनि सहजता भएको हो। यसबाट आर्थिक उपार्जन पनि राम्रो भएको छ।

पहिला दसैँ-तिहारजस्ता ठूला चाडपर्वका बेलामात्र फाट्टफुट्ट खसीबोका बिक्री हुने गर्थे। किसानलाई खसीबोका बेच्न स्थानीय हाटबजारसम्म डोहोर्‍याएर  लैजानुपर्ने झन्झटसँगै सोचेजस्तो मूल्य नपाइने बाध्यता थियो। अहिले सडक सञ्जाल विस्तार भएसँगै गाउँका खसीबोका काठमाडौं, धरान, इटहरी र विराटनगरजस्ता ठूला सहरसम्म पुग्न थालेका छन्।

अहिले गाउँमै जिउँदो खसीबोका प्रतिकिलो ५ सय रूपैयाँदेखि ६ सय रूपैयाँसम्ममा सहजै बिक्री भइरहेको छ। राम्रो मूल्य पाउन थालेपछि जिल्लामा बाख्रापालनमा किसानको आकर्षणसमेत बढेको छ। 

गाउँबाट खसीबोका संकलन गरेर काठमाडौं पठाउँदै आएका स्थानीय व्यापारी गणेश विष्टका अनुसार अहिले महिनामा २ सयका हाराहारीमा खसीबोका काठमाडौं पठाउने गरिएको छ। युवाहरू मिलेर गाउँबाट संकलन गरिएका खसीबोका काठमाडौं ढुवानी गर्दा प्रतिगोटा ८ सयदेखि १ हजार ५ सय रूपैयाँसम्म भाडा लाग्ने गरेको उनले जानकारी दिए। 

घरआँगनबाटै खसीबोका बिक्री हुन थालेपछि किनबेचमा ठूलो सहजता आएको टेम्केमैयुङ-५ मझौलेका स्थानीय हर्कराज लुइँटेल बताउँछन्। घरमै तराजुमा जोखेर बेचिने भएकाले ठगिने सम्भावना नरहेको उनको भनाइ छ। आफूलाई पैसा खाँचो परेको अवस्थामा तुरुन्तै बिक्री हुँदा गर्जो टार्न सहज भएको उनले जानकारी दिए।

'यातायातको सुविधाका कारण गाउँघरमा पालिएका खसीबोका अहिले काठमाडौंलगायतका ठूला सहरसम्म जान थालेका छन्', उनले भने, 'विगतमा अन्दाजको भरमा बेच्नुपर्दा घाटा सहनु पर्थ्यो। अहिले व्यापारी आफै खोरसम्म खोज्दै आउँछन्। खोरबाटै राम्रो मूल्यमा बिक्री गर्न पाउँदा निकै सहज भएको छ।'

अर्का स्थानीय किसान रमेश विष्टले पनि घरैबाट सोचेजस्तो मूल्यमा खसीबोका बिक्री हुन थालेपछि बाख्रापालनबाट मनग्य आम्दानी लिन सकिने अवस्था बनेको बताए। 'विगतमा पनि खसीबोका बिक्री त हुन्थे, तर सहज थिएन', उनले भने, 'आफूलाई परेका बेला तत्कालै बिक्री हुने अवस्था पनि थिएन। तर अहिले भने बिक्रीका लागि कुनै समस्या छैन।'

सडक सुविधाका कारण बजारको पहुँच विस्तार भएसँगै दुर्गम गाउँका किसानका लागि बाख्रापालन व्यवसाय भरपर्दो र गतिलो आम्दानीको स्रोत बन्दै गएको छ। रासस