.gif)
.gif)
.gif)
.gif)
.gif)
काठमाडौं- भोटेकोशी बाढी प्रभावितको उद्धार, राहत तथा पुन:स्थापनाका लागि सहयोग गर्ने राष्ट्रिय तथा अन्तर्राष्ट्रिय दाताहरु बढिरहेका छन्। सरकारी कोषमा रकम जम्मा गर्नेक्रम बढ्दो छ।
सरकारको प्रधानमन्त्री दैवी प्रकोप उद्धार कोष र प्रधानमन्त्री राहत कोषमा हालसम्म ११ अर्ब ५ करोड ५६ लाख २६ हजार ९७१ मौज्दात रहेको प्रधानमन्त्री तथा मन्त्रिपरिषद् कार्यालयले जनाएको छ।
कोषमा जम्मा भएको १ अर्ब रूपैयाँ सरकारले बाढीप्रभावित क्षेत्रका लागि निकासा गरिसकेको छ।
नौ वटा वाणिज्य बैंकमा ८ अर्ब ६ करोड २५ लाख १५ हजार ५१८ र हिमालयन बैंक र लक्ष्मी सनराइज बैंकमा रहेको डलर खातामा थप एक करोड ९८ लाख ३७ हजार ६९५ अमेरिकी डलर जम्मा भएको कार्यालयले जनाएको छ।
विपद्मा परी हालसम्म १ हजार ३४४ जनाको मृत्यु भइसकेको छ। ४ हजार ८९८ जना अझै सम्पर्कविहीन छन्।
गएको १० गते बुधबार बिहान हिम चट्टानसहित पहिरो झरेर नेपाल-चीन सीमाको ल्हेन्दे खोलामा आएको बाढी भोटेकोशी हुँदै त्रिशूलीमा पुग्दा नदीतटीय क्षेत्रमा ठूलो क्षति भएको छ। प्रारम्भिक आँकलनअनुसार बाढी र विपदबाट ७ हजार ५ सय ७० निजी घरमा क्षति पुगेको छ। यस्तै ४८ सरकारी संरचना, १८ विद्यालय र ७ स्वास्थ्य संस्थामा पूर्ण तथा आंशिक क्षति भएको छ।
यातायात क्षेत्रतर्फ ५५ किलोमिटर सडक पूर्णरूपमा क्षतिग्रस्त भएको छ भने ३७ वटा मोटरेबल पुल र ६८ वटा झोलुङ्गे पुलमा क्षति पुगेको छ।
विपद्बाट भएको कुल आर्थिक क्षति र नोक्सानी ३ खर्ब ८७ अर्ब ५४ करोड रूपैयाँ पुग्ने प्रारम्भिक अनुमान गरिएको छ। शीघ्र पुनर्लाभका लागि मात्रै ७ अर्ब १५ करोड रूपैयाँ आवश्यक पर्ने देखिएको छ।
