धादिङ- यही भदौ १० गते बिहान भोटेकोशीसहित त्रिशूली नदीमा आएको अकल्पनीय बाढीबाट सडक तथा पुलमा क्षति पुगेपछि धादिङ जिल्ला सदरमुकामबाट विभिन्न गन्तव्यतर्फ यातायात सञ्चालन सहज बनाउन चारवटा वैकल्पिक सडकलाई अस्थायी यातायात रुट कायम गरिएको छ। तीमध्ये धादिङबेँसी-सुनौलाबजार-भोर्ले, लस्करे-कोशीखोला-फोर्सेटार-कल्लेरीटार प्रभावकारी रहेको जनाइएको छ।

कुल ३६ किलोमिटर सो सडकका केही स्थानमा पिच रहेको छ, केही स्थानमा स्तरोन्नतिका क्रममा छ भने केही स्थानमा तत्काल स्तरोन्नति र कोशीखोलमा ‘बेलिब्रिज’ राख्न  जरुरी रहेको देखिन्छ। सांसद बोधनारायण श्रेष्ठले यो सडकको अवस्थाका बारेमा स्थलगत अनुगमनसमेत गरेका थिए।

प्रमुख जिल्ला अधिकारी एवं यातायात व्यवस्थापन समितिका अध्यक्ष लक्ष्मी पाण्डेय (गौतम)को अध्यक्षतामा सोमबार बसेको समितिको बैठकले विपद्का कारण अवरुद्ध तथा प्रभावित यातायात सेवा वैकल्पिक मार्गबाट सञ्चालन गर्ने निर्णय गरेको हो।

समितिले सो सडकसहित धादिङबेँसी-भुलभुले-पात्ले-फ्याक्से-स्यालडाँडा-डाँडागाउँ-कोशीखोला-फोर्सेटार,परेवाटार-आदमटार-बेलिनटार-मासटार, तथा धादिङबेँसी-टारीबेँसी-सल्यानटार-आरुघाट-गोरखाबजार-आँबुखैरेनी हुँदै चितवन र पोखरा जाने सडकलाई अस्थायी यातायात रुट कायम गरेको छ।

बैठकले ती सडक तत्काल सञ्चालन योग्य बनाउन सम्बन्धित सरकारी कार्यालयलाई स्तरोन्नति तथा आकस्मिक मर्मतको जिम्मेवारीसमेत तोकेको छ। धादिङबेँसी-सुनौलाबजार-भोर्ले, लस्करे-कोशीखोला-फोर्सेटार-कल्लेरीटार सडकको जिम्मेवारी पूर्वाधार विकास कार्यालय धादिङलाई दिइएको छ। परेवाटार-पिपलटार-आदमटार-बेलिनटार-मासटार सडकको स्तरोन्नति तथा आकस्मिक मर्मत सडक डिभिजन नुवाकोटले गर्नेछ।

त्यस्तै, धादिङबेँसी-भुलभुले-पात्ले-फ्याक्से-स्यालडाँडा-डाँडागाउँ-कोसीखोला-फोर्सेटार सडकको स्तरोन्नति तथा आकस्मिक मर्मत सघन सहरी तथा भवन निर्माण आयोजना कार्यालयले यथाशीघ्र गर्ने निर्णय गरिएको छ। बाढीबाट धादिङबेसीलाई पृथ्वी राजमार्गसँग जोड्ने सडक तथा पुलमा क्षति पुगेपछि यातायात सेवा नियमित र सहज बनाउन वैकल्पिक सडकलाई अस्थायी रुटका रूपमा प्रयोग गर्ने निर्णय गरिएको जनाइएको छ।

समितिले प्रचलित सवारी तथा यातायातसम्बन्धी कानूनी व्यवस्थाअनुसार ती सडकलाई अस्थायी रुट कायम गरिएको धादिङका प्रमुख जिल्ला अधिकारी पाण्डेयले जानकारी दिए। रासस