इलाम- माङसेबुङ गाउँपालिका-२ का किसान देशराज लिम्बूले गत वर्ष अदुवा बेचेर ३ लाख १५ हजार रूपैयाँ हात पारे। अदुवाको मुख्य उत्पादन (बच्चा) प्रतिमन (४० केजी) ४ हजार ५ सय रूपैयाँका दरले बिक्री गरेका हुन्। 'गत वर्ष अदुवाको मूल्य  थियो, उत्पादन पनि मनग्य भएकाले आम्दानी पनि प्रशस्त भयो,' उनले भने।

पाँच रोपनीमा अदुवाखेती गरी ९० मन उत्पादन गरेका उनले २० मन बीउ राखेर बाँकी बेचे। उनले १२० मन उत्पादन हुने अपेक्षाका साथ यसवर्ष २० मन बीउ रोपेका छन्। उनले भने, 'पोहोरकै जस्तो मूल्य आयो भने यस वर्ष पाँच लाख बढी आम्दानी गर्नेछु।'

माङसेबुङ-२ का अर्का किसान राजकुमार राईले गत वर्ष अदुवा बेचेर दुई लाख रूपैयाँभन्दा बढी आम्दानी गरे। ५० मन अदुवा ४ हजार रूपैयाँका दरले बेचेका उनले यसवर्ष  २० मन रोपेका छन्। यस वर्ष आम्दानी बढाउने उनको लक्ष्य छ।

'परिवारको घरखर्च र छोराछोरीको पढाइ खर्च अदुवाको आम्दानीले नै धान्ने गरेको छ,' उनले भने, 'यस वर्षदेखि खेती बढाएकाले आउँदो वर्षदेखि केही रकम बचत हुनसक्छ।'

माङसेबुङ-३ का किसान तेजु राईले यस वर्ष ६० मन अदुवा रोपेका छन्। दश रोपनीमा व्यावसायिक खेती थालेका उनले यसअघि १० मन बीउ माटोमा उपयोग गरेका थिए। जिल्लाका किसान अदुवाप्रति आकर्षित भएकाले आफू पनि व्यावसायिक खेतीतर्फ अग्रसर भएको उनी बताउँछन्। आकर्षक आम्दानीका कारण धान र अन्य खेती छाडेर किसान अदुवाखेतीमा लागेका उनको भनाइ छ।

उत्पादनका बेला प्रतिमन ४ हजार ५ सय रूपैयाँसम्म पुगेको अदुवाको भाउ अहिले माउ प्रतिमन ७ हजार रूपैयाँसम्म पुगेको छ। बच्चा र माउको मनासिव मूल्य पाएपछि किसानहरु अदुवाखेतीतर्फ आकर्षित भएका कृषि ज्ञान केन्द्रले जनाएको छ।

माउ अदुवा झापाको धुलाबारीमा अहिले प्रतिमन ७ हजारसम्म बिक्री हुने गरेको छ भने इलाममा ६ हजारमा किनबेच भइरहेको स्थानीय व्यापारी राम जवेगूले बताए। उनले भने, 'बच्चाबाट छुट्टै र माउबाट छुट्टै आम्दानी हुने भएकाले किसानलाई दोहोरो फाइदा छ।'

यहाँका किसानले ठूलो (भैँसे), मझौला र साना गरी तीन किसिमका अदुवाखेती गर्दै आएका छन्। भदौसम्म माउ अदुवाको बिक्री हुने अदुवाको मुख्य उत्पादन कात्तिकदेखि जेठसम्म हुन्छ।

जिल्लाको मुख्य व्यापारिक केन्द्र इलाम बजारका साथै बिब्ल्याँटे, मंगलबारे, गजुरमुखी, चतुरे, माङसेबुङ, पशुपतिनगर, दानबारी, हर्कटेलगायत बजारमा यहाँको अदुवा खपत हुने गरेको छ।

केन्द्रका अनुसार इलाममा तीन हजार २२१ हेक्टर क्षेत्रमा व्यावसायिक अदुवाखेती हुँदै आएको छ। गत वर्ष यहाँ ५० हजार ६२० मेट्रिकटन अदुवा उत्पादन भएको थियो। रासस