.gif)
.gif)
.gif)
.gif)
.gif)
काठमाडौं- नेपाल धितोपत्र बोर्ड (सेबोन) ले नेपालको पुँजी बजारमा नयाँ धितोपत्र वित्तीय सेवाहरू सञ्चालनका लागि बजारको तयारी बुझ्न र सरोकारवालाहरूबाट राय तथा सुझाव लिन अवधारणापत्र सार्वजनिक गरेको छ।
बोर्डले नेपालको धितोपत्र बजारमा मार्जिन लेण्डिङ, धितोपत्र उधारो तथा सापटी र शर्ट सेलिङको लागि गर्नुपर्ने नीतिगत, कानूनी, संरचनागत तथा प्राविधिक व्यवस्था सम्बन्धी अवधारणापत्र, २०८३ जारी गर्दै सर्वसाधारण तथा सम्बन्धित निकायहरूसँग सुझाव मागेको हो।
नेपाल सरकारको आव २०८३/८४ को बजेट वक्तव्य र बोर्डको नीति तथा कार्यक्रममा इन्ट्राडे, सर्ट सेलिङ, डेरिभेटिभ र मार्जिन लेण्डिङ जस्ता उपकरणहरू चरणबद्ध रूपमा सञ्चालनमा ल्याउने घोषणा गरिएको थियो।
सोही घोषणालाई कार्यान्वयन गर्दै विश्वव्यापी पुँजी बजारको अनुभव अनुरूप नेपालको पुँजी बजारलाई थप गहिरो, प्रतिस्पर्धी, सुरक्षित र आधुनिक बनाउन बोर्डले यो कदम चालेको हो।
बोर्डले तयार पारेको अवधारणापत्रमा नेपालको पुँजी बजारको वर्तमान अवस्था, अन्तर्राष्ट्रिय अनुभव र असल अभ्यास, नियामकीय प्रभाव विश्लेषण तथा नेपालका लागि उपयुक्त नीति सिफारिशहरू समावेश गरिएका छन्।
यसका साथै नेपाल धितोपत्र बोर्ड, नेप्से, सिडिएससी, ब्रोकर, बैंक तथा वित्तीय संस्था र संस्थागत लगानीकर्ताहरूको भूमिका स्पष्ट पार्दै कानूनी सुधार, प्रविधि आधुनिकीकरण र लगानीकर्ता शिक्षाको चरणबद्ध रणनीति समेटिएको छ।
