.jpg)
.jpg)
.gif)
.gif)
काठमाडौं- ललितपुरको जावलाखेलस्थित सदर चिडियाखानामा बर्डफ्लु संक्रमण पुष्टि भएपछि २७ दिनसम्म चिडियाखाना बन्द गर्नुपर्दा तीन करोड रूपैयाँबराबरको आर्थिक क्षति भएको छ।
.gif)
बर्डफ्लु संक्रमण देखिएपछि राष्ट्रिय प्रकृति संरक्षण कोषले गत असार ५ गतेदेखि सर्वसाधारणका लागि बन्द गरेको थियो। संक्रमण नियन्त्रणमा आएपछि यही साउन १ गतेदेखि चिडियाखाना पुनः सञ्चालनमा ल्याइएको छ।
.gif)
.gif)
चिडियाखानाका सूचना अधिकारी गणेश कोइरालाका अनुसार संक्रमण देखिएपछि नियमित सरसफाइ, सङ्क्रमित जीवजन्तुको उपचार तथा आवश्यक सावधानी अपनाइएको थियो। त्यसपछि पशु सेवा विभाग, केन्द्रीय पशु रोग अनुसन्धान प्रयोगशाला इपिडिमियोलोजी तथा रोग नियन्त्रण महाशाखाका वरिष्ठ अधिकारीको संयुक्त बैठकले चिडियाखाना पुनः सञ्चालन गर्ने निर्णय गरेको थियो।
उनका अनुसार सामान्य दिनमा दैनिक एक हजार ७ सय देखि एक हजार ८ सय आगन्तुकले चिडियाखाना भ्रमण गर्ने गरेका थिए। शनिबार पाँच हजारदेखि सात हजार र आइतबार तीन हजार ५ सयदेखि पाँच हजार जनासम्मले चिडियाखानामा समय बिताउने गरेका थिए। पुनः सञ्चालन भएको पहिलो दिन, साउन १ गते ८ सय जनाले मात्र चिडियाखाना भ्रमण गरेका थिए।
चिडियाखानाले बालबालिका र ज्येष्ठ नागरिकका लागि १००, विद्यार्थीका लागि १५० र अन्य आगन्तुकका लागि २५० रूपैयाँ प्रवेश शुल्क लिँदै आएको छ।
गत आर्थिक वर्षमा चिडियाखानाले करिब १८ करोड रूपैयाँ आम्दानी गरेको थियो। आर्थिक वर्ष २०८२/८३ मा २१ करोड रूपैयाँ आम्दानी गर्ने लक्ष्य राखिएको भए पनि बर्डफ्लुका कारण लामो समय बन्द रहँदा लक्ष्य पूरा गर्न चुनौती थपिएको प्रशासनले जनाएको छ।
हाल चिडियाखानाको टिकट काउन्टर बिहान १० बजेदेखि अपराह्न ४ बजेसम्म खुला रहने व्यवस्था गरिएको छ। सबै आगन्तुक साँझ ५ बजेसम्म बाहिरिनुपर्ने व्यवस्था छ। संक्रमणअघि भने टिकट काउन्टर साँझ ६ बजेसम्म खुला रहने गरेको थियो। रासस
