चितवन- बर्डफ्लूको प्रभावका कारण घटेको कुखुराजन्य उत्पादनको खपत बढ्न थालेको छ। देशका विभिन्न ठाउँमा बर्डफ्लू देखिएपछि खपत घटेको थियो। यससँगै घटेको मूल्यसमेत बढ्न थालेको छ।

बर्डफ्लूका कारण मासुको खपतमा गिरावट आएको थियो। अण्डामा कम प्रभाव परेको भन्दै पूर्ववत् अवस्थामा फर्किन थालेको किसान बताएका छन्।

नेपाल ह्याचरी उद्योग संघका केन्द्रीय अध्यक्ष राजेन्द्र लामिछानेले अण्डा र मासुको खपत पूर्ववत् अवस्थामा आउन थालेको बताए। उनका अनुसार दैनिक आठ लाख किलो हाराहारी मासु खपत हुने गरेकामा घटेर छ लाख किलोमा झरेको थियो। अहिले पुनःबढ्ने क्रम सुरु भएको छ।

लामिछानेका अनुसार चल्ला नबिकेर तीन पटकको ह्याच नष्ट गरिएको थियो। ह्याचरी उद्योगहरूले एक हप्तामा दुई ह्याच चल्ला उत्पादन गर्दछन्। ब्रोइलरको प्रतिगोटा ९० मा बिक्री भएको चल्ला २५ रुपैयाँमा बिक्री गर्नुपर्ने बाध्यता थियो। अहिले बढेर ४० रुपैयाँ पुगेको उनले जानकारी दिए।

ब्रोइलर जिउँदो कुखुरा प्रतिकिलो २५० बाट झरेर १४० रुपैयाँमा आइपुगेको थियो। अहिले बढेर प्रतिकिलो १९० रुपैयाँ पुगेको उनले जानकारी दिए। उनले भने, 'बर्डफ्लूका कारण परेको प्रभाव न्यून हुँदै गएको छ।'

नेपाल लेयर्स कुखुरापालक संघका केन्द्रीय अध्यक्ष विनोद पोखरेलले दैनिक ४५ लाख गोटा हाराहारी अण्डा उत्पादन हुँदै आएकामा बर्डफ्लूका कारण घटेर २८ लाख हाराहारीमा झरेको बताए। जेठको अन्तिममा एक क्रेट (३० वटा) अण्डाको ५५० रुपैयाँमा बिक्री भएकामा मूल्य झरेर ४५० रुपैयाँमा आइपुगेको थियो।

एक क्रेट अण्डाको लागत मूल्य ५७३.६० रुपैयाँ पर्न आउँछ। प्रतिगोटा १९ रुपैयाँ १२ पैसा पर्न आउँछ। अहिले अण्डाको खपत बढेसँगै मूल्य बढ्न थालेको उनले बताए। व्यवसायीहरूको एकताका कारण ठूलो संकटबाट मुक्त हुने अवस्थामा गएको भन्दै उनले प्रभावितहरुलाई राज्यले हेर्नुपर्ने बताए।

राष्ट्रिय पन्छी रोग अन्वेषण प्रयोगशाला भरतपुरका प्रमुख डा विजयकुमार श्रेष्ठले राम्रोसँग पकाएर खाँदा अण्डा र मासुमा कुनै असर नपर्ने भन्ने सन्देश सबैले पाउन थालेपछि मासु र अण्डाको खपत बढ्न थालेको बताए। चितवनमा दुई महिनायता बर्डफ्लू देखिएको छैन। रासस