काभ्रेपलाञ्चोक- बाढीपहिरोले बगाएका काभ्रेपलाञ्चोकका ६ झोलुंगे पुल पुनर्निर्माण गरिने भएका छन्। विशेषगरी जिल्लाको दक्षिणी क्षेत्रमा रोशी खोलाको बाढीपहिराले बगाएका ती पुल निर्माणार्थ अर्थ मन्त्रालयबाट स्रोत सुनिश्चित भएको हो। 

विसं २०८१ असोज १०-१२ गतेको अविरल वर्षासँगै रोशी खोलामा आएको बाढीका कारण क्षति पुगेको पक्की पुलसहित क्षतिग्रस्त झोलुंगे पुल झन्डै दुई वर्षपछि पुनर्निर्माण हुने भएका छन्। उक्त बाढीका कारण जिल्लाको नमोबुद्ध नगरपालिका, रोशी र तेमाल गाउँपालिका जोड्ने झोलुंगे पुलमा पनि क्षति पुगेको थियो। 

रोशी गाउँपालिका-३ स्थित नमोबुद्ध रोशी (पिपलटार सुँगुरेडाँडा झोलुंगे पुल, खाक्सी झोलुंगे पुल, रोशी गाउँपालिका-११ स्थित माम्ती पिप्ले (लोङसाङ-कालढुंगा झोलुंगे पुल) र पिप्लेदोभान झोलुंगे पुल पुनर्निर्माणको लागि अर्थ मन्त्रालयबाट स्रोत सुनिश्चित भएको सहरी विकास मन्त्रलालयअन्र्तगतको सस्पेन्सन ब्रिज डिभिजनका सूचना अधिकारी सिनियर डिभिजन इन्जिनियर प्रेमनारायण बस्यालले जानकारी दिए। 

सूचना अधिकारी बस्यालका अनुसार बाढीले क्षतिग्रस्त रोशी-९ स्थित नार्के झोलुंगे पुल र रोशी-७ स्थित कटुञ्जेबेँसी-१ युएस झोलुङ्गे पुल पुनर्निर्माणका लागि तीन करोडदेखि पाँच करोड ५० लाख रुपैयाँसम्म स्रोत सुनिश्चित गरिएको छ। त्यसैगरी वाग्मती नदीमा आएको बाढीले क्षति पुर्याएको काभ्रेपलाञ्चोकको खानीखोला गाउँपालिका र मकवानपुर जोड्ने फार्सा झोलुङ्गे पुल पुनर्निर्माणको लागि पनि स्रोत सुनिश्चित भएको बताइएको छ। 

सूचना अधिकारी बस्यालका अनुसार स्रोत सुनिश्चित भएका झोलुंगे पुल पुनर्निर्माणका लागि चालु आर्थिक वर्षमा ठेक्का आह्वान गर्ने र बहुवर्षीय योजना भएकाले आगामी आवबाट पुल निर्माणको काम सुरु गरिने छ। पुल पुनर्निर्माणका क्रममा कहीँकतै जग्गा विवाद देखिए ती योजनालाई रोकेर अन्य योजनाको काम अघि बढाइने छ। स्रोत सुनिश्चित भएका झोलुंगे पुल पुनर्निर्माणको काम डेढ वर्षदेखि दुई वर्षभित्र गरिसक्ने डिभिजन कार्यालयले जनाएको छ।
 
यसैबीच विसं २०८१ असोज दोस्रो साताको बाढीले तेमाल गाउँपालिका र मंगलटार जोड्ने रोशी खोलाको फलामे पुल बगाएको र वर्षायामको समयमा बिपी राजमार्ग अवरुद्ध भएको अवस्थामा वैकल्पिक मार्गका रूपमा प्रयोग गर्न रोशी खोलाकै मंगलटार र काल्धार जोड्ने बेलीब्रिज जडान गर्न काभ्रेपलाञ्चोक प्रशासनले सडक विभागलाई अनुरोधसमेत गरेको जनाइएको छ। 

उक्त बाढीले बिपी राजमार्गको करिब ३० किलोमिटर सडकसहित राजमार्गमा जोडिएका झोलुङ्गे पुललगायतका संरचनामा क्षति पुर्याएको थियो। रोशी गाउँपालिकाका अध्यक्ष दिनेश लामाले बाढीका कारण रोशी, तेमाल गाउँपालिका र नमोबुद्ध नगरपालिकाबीच आवतजावत गर्न बनेका झोलुंगे पुलहरू पूर्ण रूपमा क्षति हुँदा स्थानीयले सास्ती व्यहोर्नुपरेको बताए। उनका अनुसार बाढीले झोलुंगे पुल बगाएपछि पुल आसपासका नागरिकले बर्खाअघि खोलामा फड्के हालेर आवतजावत गर्ने गरेका र हाल खोला बढेको समयमा एक घण्टा टाढा रहेको पक्की वा झोलुङ्गे पुल तर्नुपर्ने बाध्यता रहेको छ। रासस