काठमाडौं- निजी क्षेत्रको अग्रणी दूरसञ्चार सेवा प्रदायक कम्पनी एनसेलले आफ्नो सेवाको गुणस्तर र वातावरणीय व्यवस्थापनका लागि  अन्तर्राष्ट्रिय मान्यता प्राप्त गरेको छ।

कम्पनीले हालै आईएसओ ९००१ र आईएसओ १४००१ को प्रमाणपत्र पाएको हो। यी अन्तर्राष्ट्रिय रूपमा मान्यता प्राप्त मापदण्डहरूले कम्पनीको सधैँ उच्च गुणस्तरीय सेवा प्रदान गर्ने तथा वातावरणीय प्रभावलाई न्यूनतम राख्ने प्रतिबद्धतालाई उजागर गरेका छन्।

आईएसओ ९००१ गुणस्तर व्यवस्थापन प्रणालीको विश्वव्यापी मानक हो, जसले ग्राहकका आवश्यकता तथा नियामक निकायहरूका प्रावधानहरू पूरा गर्न व्यावसायिक प्रतिष्ठानहरूले आवश्यक प्रक्रियाहरू अपनाउने गरेको सुनिश्चित गर्दछ।

त्यसैगरी, आईएसओ १४००१ ले वातावरणीय व्यवस्थापन प्रणालीको मापदण्ड निर्धारण गर्दछ, जसले सङ्घ संस्था तथा व्यवसायहरूलाई उनीहरूको वातावरण प्रतिको जिम्मेवारी, फोहर मैला व्यवस्थापन र विद्यमान कानुन तथा नियमहरू प्रभावकारी रूपमा पालना गर्न मार्गदर्शन गर्दछ।

एनसेलका प्रमुख कार्यकारी अधिकृत माइकल फोलेले डाटा सुरक्षा तथा गोपनीयताका लागि आईएसओ २७००१:२०२२ र आईएसओ २७७०१:२०१९ को मान्यता पाइसकेपछि अब आईएसओ ९००१ र आईएसओ १४००१ को मान्यता पाउनु सेवाको गुणस्तर प्रतिको प्रतिबद्धताको प्रमाण भएको बताएका छन्। उनले बिजनेस टु कन्ज्युमर, बिजनेस टु बिजनेस वा बिजनेस टु गभरमेन्ट जुनसुकै सेवा भए पनि यी मान्यताहरूले एनसेलको व्यवसाय विश्वव्यापी रूपमा मान्य मापदण्डअनुसार बलियो रूपमा सञ्चालित छ भन्ने कुरा स्पष्ट पारेको उल्लेख गरे।

एनसेलले यसअघि गत पुस २०८१ मा डाटा सुरक्षा सम्बन्धी दुईवटा महत्त्वपूर्ण आईएसओ मान्यता प्राप्त गरेको थियो, जसलाई यो वर्ष पनि नवीकरण गरिएको छ। यस्तो प्रमाणीकरण प्राप्त गर्ने एनसेल नेपालको पहिलो दूरसञ्चार सेवा प्रदायक हो।

यी दुई नयाँ प्रमाणीकरणहरूले नेपालको द्रुत गतिमा विकास भइरहेको डिजिटल परिदृश्यमा कम्पनीको उत्कृष्ट सञ्चालन र दिगोपनप्रति एनसेलले ध्यान केन्द्रित गरेको कुरालाई पुष्टि गर्दछन्। यसबाट आम ग्राहकहरूले थप भरपर्दो नेटवर्क पर्फर्मेन्स, अझ उत्तम सेवा गुणस्तर र वातावरणीय रूपमा जिम्मेवार सञ्चालनको सुनिश्चितता पाउनेछन्।

त्यस्तै उद्यमी तथा व्यवसायहरूले दक्षता वृद्धि, जोखिम न्यूनीकरण र बढी प्रतिस्पर्धात्मक क्षमता प्राप्त गर्नेछन् भने साझेदार, नियामक निकाय तथा लगानीकर्ताहरूले एनसेलको जबाफदेहिता, कम्प्लायन्स र निरन्तर सुधारप्रतिको प्रतिबद्धताबाट आत्मविश्वास प्राप्त गर्न सक्नेछन्।