काठमाडौं- नेपाल वायु सेवा निगमले त्रिभुवन अन्तर्राष्ट्रिय विमानस्थलमा टिकट र पासपोर्टबिना एक व्यक्ति जहाजभित्र प्रवेश गरेपछि सुरक्षाका कमाण्डर निलम्बित भएका छन्। निगमले विमानस्थलका कमाण्डर ध्रुवराज थापालाई निलम्बन गरेको हो।
सोमबार राति काठमाडौंबाट दोहा जाने तयारीमा रहेको निगमको जहाज एनएएलवाई एयरबस ३३० जहाजभित्र अनधिकृत व्यक्ति फेला परेका थिए। त्यसरी फेला परेपछि निगमले सुरक्षाका कमाण्डर थापालाई हाललाई निलम्बन गरेको हो।
‘जहाजभित्र अनधिकृत व्यक्ति फेला परेकोले सुरक्षा व्यवस्थापनमा अत्यन्त्यै लापरबाही देखिएकोले हाल तपाईंलाई सेवाबाट निलम्बन गरिएको छ,’ थापालाई पठाएको पत्रमा उल्लेख छ।
सोमबार राति १०ः४५ मा निगमको जहाजमा रौतहटका १८ वर्षीय हस्पम आलम फेला परेका थिए। उनीसँग पासपोर्ट र टिकट केही थिएन। उनी जहाजको बिजनेस क्लास सिटमा भेटिएका थिए। सो जहाज क्याप्टेन विजय लामा नेतृत्वको टोलीले उडान भर्ने तयारी गरेको थियो।
उडान कर्मचारीले उनी जहाजभित्र छिरेको देखेपछि कागजात माग्न पुगेका थिए। कागजात नभेटिएपछि कर्मचारीले प्रहरीलाई बोलाएर जहाजबाट झारेका थिए। यसरी झार्दा वाइडबडी जहाज डेढ घन्टा डिले भएको थियो।
