सुर्खेत- कर्णाली प्रदेशमा ९६ प्रतिशत रोपाइँ पूरा भएको छ। कृषि विकास निर्देशनालय कर्णाली प्रदेशका अनुसार प्रदेशको ४१ हजार ४२ हेक्टर धानखेतीयोग्य जमिनमध्ये ३९ हजार ५ सय ९४.९ हेक्टरमा रोपाइँ सकिएको हो। 

निर्देशनालयका निमित्त निर्देशक तिलकप्रसाद पाण्डेका अनुसार प्रदेशका १० जिल्लामध्ये जुम्ला, हुम्ला र डोल्पाले शतप्रतिशत रोपाइँ भएको छ। जुम्लामा दुई हजार ८ सय ९० हेक्टर, हुम्लामा ५ सय ८५ हेक्टर र डोल्पाको १ सय ९८ हेक्टरमा रोपाइँ सकिएको छ। 

चार जिल्लामा रोपाइँ ९९ प्रतिशतको हाराहारीमा पुगेको छ। जाजरकोटमा सबैभन्दा बढी ९९.२ प्रतिशत रोपाइँ हुँदा सल्यान, मुगु र रुकुम पश्चिममा समान ९९ प्रतिशत रोपाइँ सम्पन्न भएको छ।

जाजरकोटमा दुई हजार ६ सय ४५ हेक्टरमध्ये दुई हजार ६ सय २३ हेक्टर र सल्यानमा छ हजार १ सय ३४ हेक्टरमध्ये छ हजार ७२ हेक्टरमा रोपाइँ सकिएको हो। कालिकोटमा दुई हजार ४ सय ६२ हेक्टरमध्ये ९८ प्रतिशत अर्थात् दुई हजार ४ सय १२ हेक्टरमा रोपाइँ सकिएको छ।

प्रदेशमा सबैभन्दा बढी धानखेती हुने सुर्खेतमा भने ९५ प्रतिशत रोपाइँ भएको छ। सुर्खेतमा कुल १४ हजार ९ सय २१ हेक्टर क्षेत्रफलमध्ये १४ हजार १ सय ७४ दशमलव ९५ हेक्टरमा रोपाइँ सकिएको छ। दैलेखमा कुल सात हजार ६ सय २० हेक्टरमध्ये सात हजार ८६ दशमलव ६ हेक्टरमा रोपाइँ भएको छ। रासस