काठमाडौं- आकर्षक तलबमा रोजगारीका लागि विभिन्न देश पठाइदिने भन्दै ठगी गर्ने तीनजना पक्राउ परेका छन्।

प्रहरीले ठगी अभियोगमा टोखा बस्ने नुवाकोटका ४२ वर्षीय हेमबहादुर तामाङ, स्याङ्जाकी ३५ वर्षीया ईश्वरी थापा र काठमाडौं चन्द्रागिरी बस्ने काभ्रेकी ६१ वर्षीया मैयादेवी उप्रेतीलाई पक्राउ गरेको हो।

पक्राउमध्ये हेमबहादुरले सिंगापुर पठाइदिन्छु भन्दै २ जना पीडितहरूबाट २ लाख ७० हजार रूपैयाँ, ईश्वरीले माल्टा पठाइदिन्छु भन्दै १ जना पीडितबाट ६ लाख ५० हजार रूपैयाँ र मैयादेवीले अमेरिका पठाइदिन्छु भन्दै १ जना पीडितबाट ८ लाख रूपैयाँ लिइ सम्पर्कविहीन भएका थिए।

पीडितको उजुरीको आधारमा काठमाडौंका विभिन्न स्थानबाट शनिबार र आइतबार पक्राउ गरिएको हो।

पक्राउमध्ये ईश्वरीलाई आवश्यक अनुसन्धान तथा कारबाहीको लागि जिल्ला प्रहरी परिसर काठमाडौं तथा हेमबहादुर र मैयादेवीलाई वैदेशिक रोजगार विभाग ताहाचल पठाइएको प्रहरीले जनाएको छ।