म्याग्दी- म्याग्दीको बेनी नगरपालिका-९ मा रहेको धार्मिकस्थल गलेश्वर मन्दिरमा एक वर्षमा ७३ लाख रुपैयाँभन्दा बढी भेटी संकलन भएको छ।

आर्थिक वर्ष २०८१/८२ मा गलेश्वरमा पूजाआजा र दर्शनका लागि आएका भक्तजनहरूले ७३ लाख १५ हजार ९ सय २७ रुपैयाँ भेटी चढाएका गलेश्वर शिवालय क्षेत्र विकास कोषले जनाएको छ।

कोषका अध्यक्ष माधवप्रसाद रेग्मीले भक्तजनको आगमनसँगै भेटी पनि बढेको बताए। उनका अनुसार आर्थिक वर्ष २०८०/८१ मा कुल ५८ लाख ४० हजार पाँचसय १० भेटी संकलन भएको थियो।

२०८१/८२ मा नियमित ४७ लाख १० हजार दुईसय ९० र मेलापर्वमा २६ लाख पाँच हजार ६ सय ३७ रुपैयाँ भेटी संकलन भएको कोषका कार्यालय सचिव राम बानियाँले जानकारी दिए। भेटीसहित विभिन्न शीर्षकमा बैंक ब्याजबाहेक गत वर्षमा ९४ लाख १५ हजार १७ रुपैयाँ आम्दानी भएको उनले बताए।

यज्ञ दर्ताबाट चार लाख ७३ हजार पाँचसय २७, यात्री निवास भाडा सात लाख १९ हजार सात सय १४, सहयोग स्वरुप तीन लाख ५९ हजार ७९ र स्टल भाडाबापत पाँच लाख ४६ हजार सात सय ७० रुपैयाँ आम्दानी भएको छ।

गलेश्वर मन्दिर परिसरमा कोषले सञ्चालन गरेको धर्मशालामा एक वर्षको अवधिमा १० हजार जना तीर्थयात्रीहरूले सहुलियतमा आवास सुविधा पाएका छन्। मन्दिरको आम्दानी कार्यालय, पूजा व्यवस्थापन, मन्दिरका पुुजारी, ज्येष्ठ नागरिक आश्रमका भान्सेको तलबका साथै संस्कृति विद्यालय सञ्चालनमा परिचालन गरिएको कोषले जनाएको छ।

गलेश्वरमा भक्तजनले चढाउने भेटी मेलाको भोलिपल्टै र अन्य समयमा मासिक रूपमा गणना गरेर सार्वजनिक गर्ने प्रचलन छ।

मन्दिरको आम्दानीबाट गत वर्ष ज्येष्ठ नागरिक आश्रममा १५ लाख रुपैयाँ खर्चेर सभाहल निर्माण, गलेश्वर बजार सौन्दर्यकरण योजनामा बेनी नगरपालिकासँग साझेदारीमा ६ लाख रुपैयाँ, घतान स्वास्थ्य चौकीमा स्तनपान कक्ष बनाउन एक लाख रुपैयाँ सहयोग गरिएको अध्यक्ष रेग्मीले बताए।

कालीगण्डकी नदी किनारको ९ रोपनी क्षेत्रफलमा फैलिएको चट्टानमाथि अवस्थित गलेश्वर शिवालय क्षेत्र हिन्दू तथा बौद्ध धर्मावलम्बीहरूको साझा तीर्थस्थल मुक्तिनाथको प्रवेशद्वार मानिन्छ। हिन्दू धर्म ग्रन्थमा सतिदेवीको गला पतन भएर गलेश्वर नाम रहन गएको उल्लेख गरिएको छ।

यस मन्दिरमा साउन महिनाको सोमबार, बालाचतुर्दशी र शिवरात्रि पर्वमा विशेष मेला लाग्नेछ। दैनिक नित्य पूजाआजा हुने गर्छ। गलेश्वर दर्शन र पूजाआजा गरेमा मनोकांक्षा पुरा हुने धार्मिक विश्वास छ। रासस